Hoggaamiyaha mucaaradka Riek Machar ayaa ugu baaqay waxa loogu yeero Qaramada Midoobay, Midowga Afrika iyo Urur-goboleedka IGAD, inay si deg-deg ah u soo farageliyaan xiisadda ka taagan dalkiisa ee la xiriirta joogitaanka ciidamada Uganda ee Koonfurta Suudaan.
Sida lagu sheegay war-saxaafadeedka uu soo saaray Machar oo uu baahiyey Radiyaha Tamazuj ee Koonfurta Suudaan, ayaa lagu sheegay in madaxweyne ku-xigeenku uu digniino culus u diray xoghayaha guud ee Qaramada Midoobay Antonio Guterres.
Machar ayaa sheegay, in joogitaanka ciidamada Uganda ay halis ku yihiin heshiiskii nabada ee 2018-ka, kaas oo calaamad u ahaa isbedel weyn kaddib sanado badan oo uu dhiig badan ku daatay dagaallo u dhaxeeyay ciidamada dowladda iyo kooxaha mucaaradka.
Ciidamada ka soo jeeda qabiilka Nuer-ka ee daacada u ah Riek Machar ayaa dhankooda sheegay, in ciidamada Uganda ay geysteen xadgudubyo halis ah oo ay ka mid yihiin duqeymo xagga cirka ah oo ay ku qaadeen gobollada Nile-ka sare, halkaas oo ay dhimasho iyo dhaawac ku noqdeen dad badan oo rayid ah.
Dhankeeda, dowladda Uganda ayaan weli si rasmi ah uga hadlin eedeymahan, iyadoo dhinaca kale ay si dhow ula socdaan xaaladdaha cakiran ee ka taagan Koonfurta Suudaan, gaar ahaan is-aaminid la’aanta u dhexeysa dowladda iyo mucaaradka.
Baaqyadan ayaa ku soo beegmaya xilli xasaasi ah oo ay xaalada Koonfurta Suudaan kasii darayso, ayadoo laga cabsi qabo in mar kale dib u qarxaan dagaaladii sokooye ee u dhaxeeyay dawladda iyo mucaaradka dalkaas.
