Xoogagga RSF ee ka hawlgalo dalka Suudaan ayaa ku dhawaaqay, in maanta ay magaalada Al- Fasher ee xarunta gobolka Waqooyiga Darfur ku soo rideen diyaarad militari oo laga leeyahay dalka Suudaan .
Taas badalkeeda, ilo-wareedyo ka tirsan Milliteriga Suudaan ayaa u sheegay Aljazeera in “Diyaarad nooca xamuulka qaada ah ay saaka ku burburtay meel u dhow magaalada Al-Fasher, iyadoo ay saarnaayeen afar shaqaale ah”.
Ilo wareedkan ayaa intaa ku daray, inay u badan tahay in dhammaan shaqaalihii diyaaradda saarnaa ay goobta ku quurbaxeen, iyagoo ku nuux-nuuxsaday in arrintan ay ku socoto baaritaanno horudhac ah.
Dhinaca kale, hay’ad sheegata inay udooda xuquuqda Aadanaha oo ka hawlgasho Suudaan ayaa shaacisay, in 89 qof oo rayid ah ay ku dhinteen boqolaal kalena ay ku dhaawacmeen weerarrada maleeshiyaadka RSF ay ku bartilmaameedsadeen in ka badan 15 tuulo oo ku yaalla dhulka miyiga ah ee Koonfureed ka xiga magaalada Omdurman, tan iyo 27-kii bishii Maarso ee lasoo dhaafay.
Hay’adda waxa ay bayaankeeda ku sheegtay, in Ciidamada Taageerada Degdegga ah ay weerar ku qaadeen Guryo, isla markaana ay laayeen dadkii ku jiray Guryaha, taasoo ka dhan ah Xuquuqda Aadanaha.
Waxay intaasi ku dartay, in Ciidamada Taageerada Degdegga ah ay bililiqo baahsan u geysteen guryo iyo dukaamo, iyagoo soo qab-qabtay tiro dhallinyaro ah oo tuulooyinka ku noolaa, waxayna ku qasbeen in ay daabulaan alaabtii ay dhaceen.
Tan iyo bishii Abriil 2023-kii, ciidamada Suudaan iyo xoogaga Taageerada degdega ah ayaa waxay wadeen dagaal ay ku dhinteen in ka badan 20 kun oo qof, halka ay ku barakaceen ku dhawaad 15 Milyan.
