Kooxda Xuuthiyiinta ayaa ku dhawaaqday fiidnimadii Isniinta, in ay fuliyeen labo howlgal oo militari oo ay ku bartilmaansadeen bartilmaameedyo muhiimka ah oo ku yaalla magaalada Jaffa ee dhulka ay Yahuuddu gumaysiga ku haysato, iyagoo adeegsanaya gantaalaha balaastikada ah iyo diyaaradaha aan duuliyaha lahayn.
Afhayeenka milateriga Xuuthiyiinta Yahya Sareec, ayaa sheegay, in kooxdu ay fulisay howlgal milatari oo ka dhan ah bartilmaameed muhiim ah oo cadawga Yahuuddu ku lahaa magaalada la haysto ee Jaffa.
Waxa uu intaa ku daray, in Hawlgalka lagu fuliyay gantaalaha balaastigada ah ee Falastiin 2, waxa uuna carrabka ku adkeeyay, in si guul ah loo gaaray hadafkii laga lahaa.
Waxa uu sidoo kale tilmaamay, in Ciidanka Cirka ay fuliyeen howlgal tayo leh oo ka dhan ah bartilmaameedyada muhiimka ah ee cadowga Yahuudda ee degaanka Jaffa iyaga oo isticmaalaya 4 diyaaradood oo aan duuliye lahayn, kuwaas oo si guul ah u gaaray yoolalkoodii.
Afhayeenka xoogagga Xuuthiyiinta Yahya Sareec ayaa xaqiijiyay, in hawlgalada kooxdiisu ay sii socon doonaan illaa ay ka joogsanayaan duulaanka gardarada ah ay Yahuuddu ku hayso marinka Gaza, lagana qaadayo marinka go’doominta.
