Wasaaradda arrimaha dibadda ee Mareykanka ayaa ogolaatay suurtagalnimada in Yahuudda laga iibiyo bambaanooyinka kiimikada ah ee wax gumaada iyo qalabka wax lagu dumiyo iyo hub kale oo ku kacaya illaa 3 bilyan oo doolar, sida lagu sheegay bayaan ka soo baxay aqalka Pentagon-ka.
Congress-ka Maraykanka ayaa lagu wargeliyay iibka hubka ee suurtagalka ah galabnimadii Jimcaha. Nidaamkan ayaa la sheegay in uu ka baxsan yahay shuruucda u dagsan Washington ee ah in guddoomiyeyaasha iyo Guddiga Arrimaha Dibadda ee Aqalka, fursad loo siiyo in ay eegaan heshiiska, ayagoo codsan kara macluumaad dheeraad ah ka hor inta aan si rasmi ah loo ogeysiin Congresska.
Ilo xog ogaal ah ayaa sheegaya in iibka hubkan ay ku jiraan illaa 35,529 bambooyin, kuwaas oo miisaankoodu dhan yahay illaa 1,000 kiiloogaraam iyo 4,000 oo ah bambooyinka bunker-buster ah oo ay samayso shirkada General Dynamics.
Waa markii labaad oo muddo bil gudaheed ah uu maamulka Trump uu ku dhawaaqo xaalad degdeg ah oo uu ku ansixinayo hub laga iibiyo Yahuudda. Maamulka Madaxweynihii hore ee Joe Biden ayaa horey u isticmaalay sharciyad tan la mid ah oo hub looga iibinayo Yahuudda.
Arintan ayaa kusoo aadaysa ayadoo wajigii kowaad ee heshiiska xabad joojinta marinka Qaza uu socdo muddo 6 todobaad ah, kaas oo sabtida maanta ah ku egy, Yahuudda ayaana ka gaabsatay in ay gasho wada xaajoodyo ku saabsan wajiga labaad ee heshiiska, waxayna doonaysaa in ay kordhiso wejiga koowaad, si ay u soo ceshato maxaabiis badan oo ku xiran marinka Qaza, iyada oo aan ballan qaadin in ay soo afjareyso dagaalka.
