Dagaalkii ka dhacay magaalada Wad Madani ee bartamaha dalka Suudaan, oo 180 KM u jirta caasimadda Khartoum, ayaa soo bandhigay muuqaallo naxdin leh oo muujinaya burburka ay dagaalada ku reebeen kaabayaashii magaalada, mu’assaadkeedii adeegga iyo dhaqaalaha
Dagaalada ayaa gabi ahaan burburiyay kaabayaashii magaalada sida: Bangiyadii, Isbitaaladii, kaabayaasha korantada, kuwa Biyaha, Kaalmaha Shidaalka, Jaamacado, Iskuullo iyo foornooyin, arintaas oo keentay curyaaminta nolosha bulshada muddo sanad ka badan. Magaaladu waxay isku dayaysaa inay ka soo kabato burburka dagaalka kadib markii ay ciidanka malatariga dib u qabsadeen, laakiin waxay u baahan tahay dadaal badan si ay dib ugu soo noqoto bilicdii hore iyo shakligeedii wanaagsanaa.
Magaalada Wad Madani waxay leedahay in ka badan 20 bangi. Si loo ogaadoburburka baaxada leh ee saameeyay 10 ka mid ah Bankiyadaas, sida Bankiga Khartoum, Bankiga Niil, Bankiga Beeraha, Bankiga Faransiiska iyo Bankiga Dhexe ee Suudan, dhamaan xarumaha Bankiyadaas waa la burburiyay, waxaa sidoo kale la burburiyay kaabayaashoodii dhaqaalaha, waxaa la barakiciyayshaqaalahoodii, iyadoo la xaday hantidii taallay.
Burburku wuxuu sidoo kale saameeyay tobanaan shirkadood, warshado soo saara dharka iyo kuwa soo saara buskud iyo macmacaanada oo ku yaallay magaalada.
Xarumihii caafimaadka ee Wad Madani ayaa sidoo kale waxaa soo gaaray burbur aad u wayn, sida uu sheegay agaasimaha caafimaadka iyo daawaynta ee wasaaradda caafimaadka ee gobolka Al-Jaziira, Tariq Al-Ajwa, kaas oo sheegay, in wax ka badan 17 Isbitaal iyo 34 Xarumo Caafimaad oo ku yaallay Magaalada ayburburiyeen Ciidamada Tageerada Degdegga ah.
Dhankeeda, markaad u guur gasho muuqaalada iyo sawirada guud ee tiro ka mid ah xarumahan caaafimaad, burburka weyn ee soo gaaray sida Isbitaalka Wadnaha, Isbitaalka Madani, iyo Isbitaalka Suudaanays-British, kuwaas oo loo geystay duqeymo aan kala sooc lahayn oo sababay inuu ka kaco dab weyn iyo gubashada qaybo kamida Isbitaalladaas.
Burburka soo gaaray magalaada ayaa sidoo kale waxaa ku jiray in ka badan 30 xarumood oo caafimaad ah oo gaar loo leeyahay, waxaana la dhacay in ka badan 200 oo farmasi, kuwaas oo laga xaday dhamaan wixii dawo taalay, waxaana lagu qiyaasay hantida halkaas lagu dhacay inay gaarayso Malaayiin dollar.
Marka aad daawato muuqaalka guud ee magalaada iyo xarumaha caafimaad ayaa ku arkaysaa burburka loo gaystay isbitaalada iyo xarumaha caafimaadka ee sida gaarka ah loo leeyahay ee ku yaalla wadada Dhakhaatiirta ee magaaladaas. Tan ayaana qayb ka ah xatooyada loo gaystay goobaha caafimaadka ee ku yaalla magalaada wad Madani.
Tan iyo bishii December ee sanadkii 2023-ka, waxaa magaalada Wad Madani ka maqan adeegyadii Korontada, waxaana gabi ahaanba go’ay isticmaalkii korantada, sidoo kale waxaa joogsaday dhaq dhaqaaqii gaadiidka, wuxuuna burburkusaameeyay baalayaasha korontada, iyo Sidoo kale waxaa wali maqan shirkadihii biyaha siin jiray magaalada.
Dadka ku nool magalaadan ayaa xaalad adag ku jiray intii ay ciidamada RSF xoogga ku haysteen magaaladan, waxayna dadka ku khasabtay inay biyaha kasoo dhaansadaan wabiyada, matooradii biyaha keeni jiray magaalada oo go’ay awgood.
Guddoomiyaha gobalka Al-Jaziira ninka lagu magacaabo Taahir Al-Khayr ayaa war–saxaafadeed uu soo saaray ku sheegay, in dowladdiisu ay billowday dib u soo celinta adeegyadii biyaha iyo korontada ee magaalada Wad Madani, balse waxa uu tilmaamay in howshan ay qaadan karto muddo, isla markaana ay suurtagal tahay in biyaha dib loo soo celiyo sida ugu dhaqsaha badan.
Wad Madani ayaa waxaa ku yaalla jaamacado dhowr ah, balse markii uu dagaalku soo gaaray magaalada, waxaa gabi ahaanba joogsaday howlihii ay ka shaqeynayeen jaamacadihii magaalada oo ay kamid ahayd Jaamacada Jaziira.
Jaamacada Jaziira oo ku taalla xaafada Al-Nishishiba, ayaa joojisay dhamaan kuliyadihii ay bixin jirtay , sababo la xiriira dagaalka oo sii cuslaaday awgiis, waxayna kamid noqotay goobihii ay saameeyeen madafiicdii laiswaydaarsanayay.
Ugu dambayntii dagaaladan ayaa waxaa ku xirmey kaabayaashii bulshada sida isbitaalo iyo jaamacado ku yaalla magaalada Wad Madani, kaddib dagaaladii laisku riiqmay ee ciidamada RSF iyo kuwa dawladda ku dhexmaray magaaladan. Waxaa sidoo kale khasaaraha magaaladan gaaray kamida burburka kaabayaashiidhaqaalaha, xatooyada qalabkii casriga ahaa ee shaybaarada Isbitaalada iyo barakicinta shaqaalihii caafimaad ee ka hawlgali jiray Isbitaalada.
