Khabiirka dhanka milatariga ah oo ka tirsan xoogagga Xuuthiyiinta oo lagu magacaabo Korneyl Mujib Shamsan ayaa shaaca ka qaaday, sifooyinka gaarka ah ee uu leeyahay gantaalka “Falastiin 2”, kaas oo ay Xuutiyiinta ku garaaceen dhulka ay Yahuuddu gumaysato ee Falastiin, isagoo sababay dhaawacyo iyo xaalado argagax leh.
Waxa uu sheegay in gantaalka “Falastiin 2” oo la casriyeeyay intii lagu jiray dagaalkii ay Yahuuddu ku qaaday Gaza, uu xawaarihiisa ugu dambeeya yahay 16 Mach, taas oo ka dhigaysa in dhammaan qalabka wax-ka hortaga ee gobolka uusan awoodin inuu qabto.
Israa’iiliyiinta ayaa ku dhaawacmay kaddib markii gantaal laga soo tuuray Yemen uu ku dhacay deegaanka Jaffa oo u dhow Tel Aviv, subaxnimadii hore ee Sabtida, iyadoo dhawaaqa seeriga laga maqlayay deegaanno badan oo katirsan dhulka ay Yahuudda gumaysato ee Falastiin. Idaacadda rasmiga ah ee Sahaayinada ayaa sheegtay, in ciidamadu ay baarayaan sababtii keentay inay ku fashilmaan inay ka hortagaan gantaalka Yemen ee ku qarxay Tel Aviv oo ay ku dhaawacmeen 30 qof.
Shamsan waxa uu tilmaamay in nidaamyadii ugu dambeeyay ee THAAD, oo uu Maraykanku u keenay ilaalinta Yahuudda, uu xawaarihiisa ugu badnaan yahay 9 Mach, sidaas darteedna aanu jirin nidaam maanta jira oo ka hortegi kara gantaal xawaarahiisu yahay 16 Mach.
Waxa uu carabka ku adkeeyay, in nidaamyada gantaallada ka hortaga ee Yahuudda uu ku guul-dareystay inuu ka hortago gantaalada Yemen. Shamsan waxa uu intaa ku daray – mar uu waraysi siinayay Aljazeera – in “horumarinta awoodaha gantaalaha Yemen ay la macno tahay in ay leedahay awood isle’eg oo udhaganta awoodaha ka jira gobolka”. Waa siduu hadalka udhigaye.
Waxa uu xaqiijiyay, in hadalka ku saabsan horumarinta gantaalka “Falastiin 2” uu bilaabmay bishii Sebtembar ee la soo dhaafay, waxaana ka horreeyay horumarinta gantaalaha “Hatem” ee hypersonic, kaas oo loogu talagalay in lagu weeraro bartilmaameedyada badda.
Kooxda Xuuthiyiinta ayaa daaha ka qaaday gantaalkan horaantii bishii June 2024-kii, waxayna sheegeen in uu ka tirsan yahay nooca gantaalaha Balaastigada ah ee hawada sare, uuna yahay mid horumarsan oo laga hagayo dhulka.
Dhinaca kale, khabiirka milatariga ee Yemen waxa uu uga digay Yahuudda, in hawlgallada Xuutiyiinta ay kordhi doonaan, ayna bartilmaameedsani doonaa gooba xasaasi ah, oo ay kamid yihiin xarumaha saliidda, gaaska iyo guud ahaan dhaqaalaha.
Sidoo kale, khabiirka ku takhasusay arrimaha Yahuudda, oo lagu magacaabo Mahmoud Yazbek, ayaa xaqiijiyay, in ciidammada gumaystaha iyo warbaahinta Yahuudaba ay awoodi waayeen inay qariyaan xaqiiqada wixii dhacay, isagoo tilmaamay in gantaalka Yemen uu ceeb weyn ku keenay ciidammada iyo nidaamyada siyaasadda ee Sahaayinada.
Waxa uu sheegay in nidaamyada difaaca ee Yahuudda aysan xitaa ogaan karin gantaalka Yemen markii uu soo galay hawada dhulka ay Yahuudda gumaysato, taasoo muujineysa fashilka dhabta ah ee nidaamka difaaca ee Yahuudda.
Mar uu ka hadlayay saamaynta ay weerarada Xuuthiyiinta ku leeyihiin in heshiis uu dhex maro kooxaha muqaawamada iyo Yahuudda, ayuu Yazbeki ku micneeyay in dagaalka Yemen uu yahay mid taageero u ah marinka Gaza, hadii dagaalka Gaza la joojiyana ay Xuuthiyiinta joojinayso weerarada, balse wuxuu shaki galiyay in Yahuudda ay wax niyad ah ka leedahay joojinta dagaalka.
Waxaa xusid mudan in wargeyska Maariv ee ka soo baxa Yahuudda uu mar sii horreysay shaaca ka qaaday in Xuuthiyiintu ay Sahaayinada ku garaaceen in ka badan 200 oo gantaal iyo in ka badan 170 diyaaradood oo walxaha qarxa ah tan iyo bilowgii dagaalka.
