Wasiirkii hore ee difaaca Yahuudda Yoav Galant ayaa shaaca ka qaaday, in u diyaar garowga howlgalkii Pager uu socday sanado ka hor dagaalka, isagoo sidoo kale ka hadlay tafaasiisha la xiriirta maareynta dagaalka iyo arrinta maxaabiista ku xiran Marinka Qaza.
Howlgalka duqeynta ah ee ay sirdoonka Yahuuddu ku qaadeen kumannaan ka tirsan Xisbullaah ayaa dhacay 17-kii bishii September, halkaas oo ay ku dileen tiro badan oo ka tirsan ciidamada ururka shiicada ah ee Xisbullaah.
Duqeymahan ayaa ka dhacay deegaano badan oo ka tirsan dalka Lubnaan, sida xaafadaha koonfureed ee Beirut, magaalooyinka Bekaa, Nabatiah, Al-Hawsh, Bint Jbeil, Tire, Tripoli, Baalbek, iyo kuwo kale.
Marka la eego arrinta maxaabiista Marinka Qaza, wasiirkii hore ee difaaca Yahuuddu waxa uu sheegay, in ciidanka la siiyay amar ah in ay adeegsadaan habraaca Hannibal, kaas oo ay ka dhalanayso in maxaabiistu ay khatar galaan, ayadoon lakala soocayn ayaga iyo dagaalyahanada gacanta ku haya, waana sababata keentay in maxaabiis badan ay ku dhintaan duqaymaha ay fulinayaan diyaaradaha Yahuudda.
Galant ayaa waraysi uu siiyay Channelka 12 ee Yahuudda ku sheegay, in weeraradii uu ku qaaday masaajidka Al-Aqsa wasiirkii hore ee amniga Yahuudda Itamar Ben-Gvir ay dhabarjab ku ahayd siyaasada Sahaayinada taas oo kicisay carada dadka muslimiinta ah.
Waxa uu sidoo kale tilmaamay in Wasiirka Maaliyadda Bezalel Smotrich uu caqabad ku noqday dhameystirka heshiiska xabad-joojinta ah ee haatan lagalay, kaddib markii uu ku hanjabay inuu ka baxayo maamulka Sahaayinada, maadaama Tel Aviv ay soo gabagabeyn kartay heshiiskan 2024-kii.
Galant waxa uu daaha ka qaaday in Ra’iisal Wasaare Benjamin Netanyahu uu u sheegay, labo arrimood ka hor inta aanu bilaaban hawlgalka dhulka ee Qaza:
Midda kowaad ayaa ahayd in kumannaan askari lagu dili doono Marinka Qaza, hadii ay isku dayaan ciidamadoodu inay galaan gudaha dhulka Falstiiniyiinta, arinta Labaad ayaa ahayd in Xamaas ay maxaabiista Yahuudda u adeegsan doonto masraxa siyaasada, ugu dambayntiina uu dagaalkani kusoo dhamaan doono fashilka ciidamada Sahaayinada.
Dagaalka kaddib, Galant ayaa wali aaminsan in aanay suurtagal ahayn in la sameeyo hawlagl lagusoo afjaro Xamaas, taas oo ah wax aan macquul ahayn oo khilaafsan waaqica ka jira saaxada, isaga oo sheegay in hadii ay Yahuuddu isku daydo inay shacab ku deegamayso dhulka Falastiin ay ka dhalan doonto musiibo laga sheekeeyo mustaqbalka.
Bishii November ee la soo dhaafay, Netanyahu ayaa ku dhawaaqay xil ka qaadista Galant iyo magacaabista Israel Katz, iyadoo Gideon Sa’ar uu la wareegay booskii wasaaradda arrimaha dibadda ee Katz uu hayay. Isaga oo aan wax sharraxaad ah ka bixin Netanyahu sababata uu wasiirkiisa xilka uga qaaday, hase ahaatee wuxuu arintaas u sababeeyay in dhibaato ka dhalatay kalsooni daradii dhex martay isaga iyo wasiirka gaashaandhigga aanay suurtogal ahayn in lagusii wado dagaalka.
Waxaa jira kala duwanaansho badan oo u dhexeeya Galant iyo Netanyahu, oo labaduba ka socda xisbiga Likud, oo ku saabsan habka loo maaraynayo dagaalka lagu xasuuqayo reer Qaza iyo dib usoo celinta maxaabiista Yahuudda ee ku jira gacanta Falstiiniyiinta.
