Ilo xog ogaal ah oo dhanka ciidamada ah ayaa ku waramaya, in wasaaradda gaashaandhigga Suuriya ay u xilsaartay dhismaha ciidanka cusub labada guddi ee kala ah dib u habeynta iyo magacaabista, oo mid walba uu leeyahay madax-bannaani buuxda, ujeeddaduna tahay in la isku dhafo jabhadaha kacaanka oo laga dhigo hal ciidan.
Ilahan oo codsaday in aan magacooda la shaacin ayaa sheegay, in guddiga dib u habeynta uu madax u yahay Sarreeye Guuto Abdul Rahman Hussein Al-Khatib oo ka mid ah shan sarkaal oo loo dalacsiiyay darajada Sarreeye Guuto oo ay ku dhawaaqday Wasaaradda Gaashaandhigga 28-kii December.
Waxa uu intaa ku daray, in Guddiga dib u habeynta uu sameeyay Guddi gaar ah oo howshoodu tahay in ay tiro koob dhameystiran ay ku sameeyaan dhammaan qeybaha kala duwan ee ay ka kooban yihiin kooxaha hadda jira, iyadoo la tirinayo tirada xubnaha ay ka kooban tahay iyo hubka ay heystaan koox kasta, si loogu diyaariyo isku dhafka ciidamada cusub.
Guddiga tira-koobka ayaa soo saaray habab adag oo lagu xakameynayo tirada xubnaha koox kasta, loogana hortagayo in la fara-geliyo ama la geliyo magacyo been abuur ah, sida in nambarka hubka lagu dhejiyo magaca dagaalyahanka.
Guddiga magacaabista waxaa madax u ah Taliyaha Ciidanka Asluubta Sareeye Gaas Cali Nuur El-Diin Al-Naasan, waxayna u xilsaaran yihiin magacaabista Taliyaasha Qeybaha iyo Saraakiisha sare ee Ciidanka, waxaana xubnaha ka tirsan ay u badan yihiin khubara dhanka farsamada ah, kuwaasi oo caan ku ah xirfadda ciidannimo ee xilliyada qorsheynta iyo fulinta dagaalada.
Maamulka cusub ee Suuriya ayaa dhowr jeer ku celceliyay inuu doonayo in hubka lagu hakiyo gacanta dowladda cusub, iyadoo loo maraya yagleelidda ciidan cusub. Wasiirka gaashaandhigga Marhaf Abu Qasra ayaa kulamo xiriir ah la qaatay madaxda kooxaha milateriga, ujeeddadiisuna tahay in la sameeyo iyo in la isku dhafo jabhadaha halkaas ka jira.
Al-Sharaa ayaa dhowr jeer ku nuuxnuuxsaday in taliska guud uusan ogolaan doonin in hub ka baxsan dowladda, isagoo carrabka ku adkeeyay in mandiqa dowladnimo uu ka duwan yahay caqli-galkii kacaanka.
