Muddo 15 bilood ah, Ra’iisul Wasaaraha Yahuudda Benjamin Netanyahu ma joojin ku celcelinta yoolalkiisa ku aaddan dagaalka Marinka Qaza, oo uu ugu muhiimsanaa soo afjaridda joogitaanka militari iyo midka siyaasadeed ee dhaqdhaqaaqa wax iska caabinta Falastiiniyiinta ee Xamaas.
Ka sokow baabi’inta Xamaas, Netanyahu wuxuu dejiyay laba yool oo kale oo waaweyn, kuwaas oo kala ahaa; dib u soo celinta maxaabiista si xoog ah iyo ka hortagga khatar kasta oo mustaqbalka ku imaan karta kayaanka Sahaayinda ah oo ka soo bixi karta Qaza.
Sida lagu sheegay warbixin uu Suhayb Al-Asad u diyaaray warbaahinta Aljazeera, wuxuu sheegay in Xamaas meesha laga saaro ciidan ahaan iyo awood ahaanba ay ka dhigan tahay in dhaqdhaqaaqaasi aanu jiri doonin marka lagu dhawaaqo xabbad-joojinta, halka hadafka istiraatijiyadeed uu ahaa in Marinka aanu noqon mid khatar ku ah Yahuudda weligeed.
Si loo gaaro yoolalkaas, Yahuuddu waxay gebi ahaanba go’doomisay marinka Qaza, iyadoo ka hortagtay in dawadda, cunnada iyo shidaalka la soo geliyo marinka, waxayna marinkaas ay go’adoomiyeen u edeegsadeen hubka wax gumaada, iyagoo beegsaday masaajida, isbitaalada, iskoolaadka iyo xeerooyinka qaxootigu ku barakaceen.
Go’aanka siyaasadeed ee ay Yahuuddu qaadatay ayaa sababay dhimashada, in ka badan 46 Kun oo qof, waxaana la waayay illaa 10 Kun oo kale, halka ay ku dhaawacmeen wax kabadan 100 Kun oo qof, iyagoo taas ku doonaya inay ku gaaraan hadafkii uu Netanyahu iyo maamulkiisa xagjirka ah ay ka lahaayeen Marinka Qaza.
Mudo kaddib maamulka Yahuudda ayaa bilaabay in sameeyaan isku dayo dib ugurasho fulaynimo ah, kaddib markii ay fagaaraha dagaalka ku wajaheen dhiigbax joogto ah, iyadoo Madaxii hore ee wasaarada shaqaalaha ee Yahuudda Benny Gantz iyo taliyihii hore ee ciidamada Gadi Eisenkot ay isaga baxeen golaha dagaalka, kaddib todobaadyo is afgaranwaa ah.
Labadan nin ayaa Netanyahu ku eedeeyay in uusan lahayn istaraatiijiyad ciidan iyo mid siyaasadeed oo uu ku galo dagaalka, waxaana ay isugu soo baxeen waddooyinka iyaga oo ay garab taagan yihiin dad badan oo mucaarad ku ah maamulka Yahuudda , Labadan masuul ayaa Natanyahu ugu baaqay in uu heshiis xabad-joojin ah lagalo Xamaas, si loo soo daayo maxaabiista Yahuudda.
Netenyahu wuxuu ku adkaystay inuu sii wadi doono dagaalka, wuxuuna galay marinka Qaza isagoo wata cudud ciidan oo xooggan, Natanyahu ayaa sheegay in uu dagaalka dib uga laaban doonin illaa uu ka gaarayo saddexdii yool ee uu horay u iclaamiyay inuu ay ku xiran yihiin joojinta dagaalka.
Weerar kasta oo ay Yahuuddu ku qaadaaan marinka Qaza, Yahuuddu waxa ay ku waynaysay askar badan, isku day kasta oo ay ku doonaysay inay kusoo furato maxaabiisna waxay sabab u noqonayeen in la dilo tiro maxaabiis ah.
Yahuudda kuma aysan guuleysan in ay dib u soo celiyaan maxaabiista, marka laga reebo hal mar oo ay soo furteen 4 maxbuus oo Yahuud ah, iyadoo ay taasi barbar socotay dhimashada iyo dhaawaca boqolaal Falastiiniyiin ah oo rayid ah oo ku jiray xerada Nuseyrat, kaddib 8 bilood oo dagaal ah, waxaana guud ahaan howlgalkaas lagusoo furtay maxaabiista uu soo gabagaboobay isagoo qarka u saaran inuu fashilmo.
Waxaas oo dhan ma joojinin banaanbaxyada ka socday waddooyinka Yahuudda, iyadoo dibad-baxayaashu ay si isdaba joog ah u xaqiijiyeen in ay aaminsan yihiin in Netanyahu uusan awoodin in uu gaaro yoolalka dagaalka, gaar ahaan in maxaabiista uu nolol ku soo celiyo, iyada oo aan wax heshiis ah lala gaarin Xamaas.
Hogaamiyaha mucaaradka Yair Lapid ayaa sheegay, in guusha kaliya ee uu dagaalka lagusoo afjari karo ay tahay heshiis soo celinaya maxaabiista oo nool. Halka wasiirkii xagjirka ahaa ee Amniga Yahuudda Ben-Gvir oo iscasilay isaga oo ka soo horjeeda joojinta dagaalka iyo wasiirka maaliyadda Bezalel Smotrich ay kusii adkaysanayeen inay dagaalka sii wadaan.
Heshiiska hada la galay ayaa rajo ka muujinaya in dagaalka la joojiyo, kaas oo ay ciidamada Yahuuddu kaga baxayaan Jiidda Qaza, iyo in sidoo kale gargaar la gaarsiiyo shacabka Falastiiniyiinta ah ee la go’adoomiyay, iyadoo dadkii ka barakacay qaybo kamida marinka loo ogolaaday inay dib ugu laabtaan guryahooda.
Balse heshiiska lagu dhawaaqay ayaa ahaa mid lala galayo Xamaas, kuwaas oo uu Netanyahu ballan qaaday inuu si buuxda u ciribtiri doono, heshiiskan ayaana dhigaya in la soo celiyo maxaabiista Yahuudda ee haray ayagoo nool, si loo sii daayo maxaabiista Falastiiniyiinta ee ku jira xabsiyada Yahuudda.
Qodobada lagu heshiiyay ayaa ka dhigan wax kasta oo ay iska caabin ku sameeyeen bilihii dagaalku socday, waxaana uu sheegay in uu noqon doono sida kaliya ee dagaalka lagu joojin karo maxaabiistana lagu soo celin karo.
Ugu dambayntii Heshiiskan ayaa si cad u qeexaya in ay ugu dambayntii Yahuuddu ogalaatay inay heshiis la galaan Xamaas, si ay Maxaabiistooda u helaan ayagoo nool, Wax iska caabinta ayaana wali ku taagan dhamaan qodabadii ay iclaamiyeen inay hadaf uyihiin, ayagoon wax tanaasula samayn mudadaas uu dagaalku socday.
