Madaxweynaha Faransiiska Emmanuel Macron ayaa maanta ku martigelin doona hoggaamiyeyaasha Yurub shir degdeg ah oo looga hadlayo dagaalka Ukraine, kadib markii saraakiisha Mareykanka ay sheegeen, in Yurub aysan dawr ku yeelan doonin wadahadal kasta oo lagu soo afjarayo colaadda.
Madaxtooyada Faransiiska ayaa Axaddii sheegtay, in Macron uu ku baaqay wadahadallo wadatashi ah oo looga hadlayo isbeddelka weyn ee ku yimid siyaasaddii Mareykanka ee ku aadan Ukraine iyo khatarta ka dhalan karta amniga qaaradda Yurub.
Shir madaxeedkan ayaa waxaa ka qeyb galaya ra’iisul wasaaraha Jarmalka Olaf Scholz, ra’iisul wasaaraha Poland Donald Tusk, xoghayaha guud ee NATO Mark Rutte, ra’iisul wasaaraha Talyaaniga Giorgia Meloni, guddoomiyaha guddiga Yurub Ursula von der Leyen iyo madaxweynaha golaha Yurub Antonio Costa.
Madaxweynaha Mareykanka Donald Trump ayaa ka yaabiyay xulafadiisa Yurub todobaadkii hore markii uu ku dhawaaqay, inuu taleefoon kula soo xiriiray dhiggiisa Ruushka Vladimir Putin isagoo aan la tashanin madaxda Yurub, wuxuuna sheegay, inuu bilaabayo inuu horay u sii wado geeddi-socod nabadda lagu dhex dhigayo Moscow iyo Kiev.
Ergayga Trump ee Ukraine, Keith Kellogg, ayaa fajac kale ku abuuray reer Yurub markii uu Sabtidii sheegay, in Yurub aanay ka qayb qaadan doonin wadahadallada nabadda ee Ukraine, kadib markii su’aal laga waydiiyay arinkaas.
Tobaneeyo kulan oo kuwan la mid ah ayaa daaha ka rogay in 27-ka waddan ee Midowga Yurub ay ku kala qeybsan yihiin arinta Ukraine, isla markaana ay ku dadaalayaan inay la yimaadaan qorshe wadajir ah oo lagu soo afjarayo dagaalka Ukraine, iyo sidii uu ula macaamili lahaa Ruushka saddex sano kadib markii uu ku duulay dalka ay deriska yihiin.
Saraakiisha Midowga Yurub ayaa sheegay in wadamada qaar aysan ku faraxsanayn kulanka maadaama uu ahaa mid u gaar ah madaxda oo kaliya ee uusan ahayn shir madaxeedka Midowga Yurub oo dhameystiran.
Madaxtooyada Faransiiska ayaa isku dayday inay meesha ka saarto walaacyadaas, iyadoo sheegtay, in kulanka berri uu horseedi karo qaabab kale, iyada oo ujeedadu tahay in la isu keeno dhammaan saaxiibada daneeya nabadda iyo ammaanka Yurub.
