Ciidamada dawladda Suudan ayaa warbaahinta u sheegay in ay gabi ahaanba la wareegeen saldhigyo muhiim ah oo dhaca bariga wabiga Niil, halkaas oo ay cudud mulitari ku joogeen ciidamada Taageerada Degdegga ah.
Ilo-wareedyo ayaa soo sheegaya, in ciidammada Suudan ay la wareegeen saldhigga 13-aad ee Bariga wabiga Nile, halkaas oo laga qabsaday xooggaga Taageerada degdegga ah, waxaana ciidamada dawladda u suuragashay in ay ku dhawaadaan Buundada Manshiya ee isku xirta bartamaha Khartoum iyo xarunta deegaanka bariga wabiga Niile.
Saraakiil ka tirsan milatariga dawladda ayaa sheegay, in ciidamadu ay horumarro ka sameeyeen xaafado ku yaalla bariga wabiga Niil, halka ilo xog-ogaal ah oo ka tirsan ciidamada Gaashaandhiga Suudan ee ka barbar dagaalamaya militariga dalkaas ay sheegeen, in ay ku dhow yihiin qabsashada bariga buundada Manshiya.
Taliyaha ciidamada aagga Al-Shajara Sarreeye Gaas Nasr al-Diin Abdel Fattah, ayaa ballan qaaday in uu qabsan doono buundada isku xirta bartamaha iyo koonfurta magaalada Khartoum iyo qasriga madaxtooyada, inta lagu guda jiro bishan barakaysan ee Ramadan.
Dagaaladan ayaa sii xoogaystay kaddib markii maleeshiyaadka RSF ay sheegeen in ay ku dhawaaqayaan xukumad ka madax banana dawladda Suudan, taas oo katalin doonta dhulka ay haatan xoogga ku haystaan ciidamada Taageerada Degdegga ah.
