Maamulka maxalliga iyo warbaahinta dalka Mareykanka ayaa sheegay, in nin kasoo jeeda gobal Florida ee dalkaasi xabsiga loo taxaabay, kadib markii uu rasaas ku furay baabuur ay saarnaayeen labo nin oo uu umalaynayay inay Falastiiniyiin yihiin, balse la xaqiijiyay inay yihiin Yahuudd booqasho ku joogay dalkaas.
Saraakiisha kowntiga Miami-Dade ayaa sheegay, in eedaysanaha oo 27 jir ah, lagu soo oogay labo dacwadood oo isku day dil ah waxaana xabsiga loo taxaabay Axaddii lasoo dhaafay.
Sarkaal booliis ah ayaa xaqiijiyey, in warar hore oo ay warbaahinta maxalliga ah ka qoreen uu ninkaas sheegay, in isagoo baabuurkiisa ku dhex wata xeebta Miami uu arkay labo qof oo uu rumaysan yahay inay Falastiiniyiin yihiin, kadibna uu rasaas ku furay ayna ku dhaawacmeen, isagoo kama danbaystii yaqiinsaday in makrigii iyo baladii uu maleegayay ay isaga kusoo noqotoy.
Saraakiisha booliiska ayaa sheegay, in mid ka mid ah labada Yahuud laga dhaawacay garabka, halka kan kalena laga toogtay cududda hore, sida ay ku warantay wakaaladda wararka ee Reuters.
Tani waxay ku soo beegantay iyadoo ay sii kordhayaan nacaybka ay dadka Ameerikaan ah u qabaan Muslimiinta tan iyo markii ay Yahuudda – oo taageero militari ka helaysa Maraykanka – ay bilowday dagaalka Marinka Gaza 7-dii Oktoobar, 2023, kaas oo horseeday dhimashada iyo dhaawaca illaa 160 Kun Falastiiniyiin ah, burbur weyn iyo macaluul ka sii daraysa oo ka jirta Marinka Gaza.
