Ciidanka guutada qaraxyada ee xarakada Alshabaab ee ka dagaalama gobolka Gedo, ayaa saacadihii lasoo dhaafay qarax culus la beegsaday ciidamo katirsan dowlada federaalka Soomaaliya oo ku sugan gudaha degmada Beled-xaawo.
Weerarkan qaraxa ayaa si gaar ah loogu beegsaday fariisin ciidanka dowlasa federaalka ay ku leeyihiin degmada Beled-xaawo, dhawaqa qaraxa ayaa laga maqlay xaafado ka tirsan degmadaasi.
Wararka lagu kalsoon yahay ayaa inoo xaqiijiyay in uu jiro khasaare qaraxaasi kasoo gaaray ciidamada dowlada ee la beegsaday, howlgalkaan ayaana qayb ka ah weeraro isugu jiray qaraxyo iyo dagaal toos ah oo maalmihii u dambeeyay ay militeriga xarakada Alshabaab ka fulinayeen gudaha degmada Beled-xaawo.
Howlgalladaasi waxaa ka mid ah qarax lagu dilay guddoomiye ku xigeenkii koowaad ee maamulka degmada Beled-xaawo oo lagu magacaabi jiray Cabdifataax Nuur Mataan iyo laba askari oo kale, halka sidoo kale lagu dhaawacay ilaa 7 kale oo ay ku jiraan gudoomiye ku xigeenka labaad ee maamulka degmadaasi oo lagu magacaabo Cabdullaahi Cabdi iyo hanti dhowraha degmadaasi.
