Ruushka ayaa si kulul u diiday xabad joojin kasta oo ku meel gaar ah oo laga sameeyo dalka Ukrain, kadib markii Dawladaha Faransiiska iyo Britain ay soo jeediyeen in xabbad joojin qayb ah la dhex dhigo dawladaha Ruushka iyo Ukraine, taas oo soconeysa muddo bil ah.
Wasaaradda Arrimaha Dibadda ee Ruushka ayaa u tixgelisay, in xabbad-joojin ku meel gaar ah oo laga sameeyo Ukraine, sida ay soo jeediyeen Paris iyo London, ay gabi ahaanba tahay wax aan la aqbali karin.
Afhayeenad u hadashay wasaaradda Arrimaha Dibadda ee Ruushka ayaa tiri “Waxaa lagama maarmaan ah in la gaaro heshiisyo adag oo xal kama dambeys ah looga gaarayo dagaalka qarxay saddex sano ka hor” iyadoo u tixgelisay, in xabbad-joojin kasta oo waqti xaddidan ah oo u oggolaanaysa ciidamada Ukraine inay dib u habeeyaan sufuuftooda ay tahay mid aan gabi ahaanba la aqbali karin, dhanka kalana ka soo horjeeda natiijada la rabo.
Haweenaydaan ayaa intaa ku dartay, in dawladaha Yurub ay raadinayaan xabad joojin lagu dhiso ciidamada Ukraine, oo dhibaatooyin kala kulmaya jiida hore ee dagaalka, isla markaana Ukraine ay u adeegsan doonto xabad joojintani xoojintaan awooddeeda ciidan. Waa sida ay hadalka u dhigtaye.
Arintaan ayaa timid, kadib markii Washington ay Isniintii ku dhawaaqday, inay hakisay kaalmadii milatari ee ay siin jirtay Ukraine, xilli ay isku soo dhawaanayeen Ruushka iyo Mareykanka tan iyo markii uu Trump telefoonka kula xiriiray dhiggiisa Ruushka Vladimir Putin 12-kii Febraayo.
