Ruushka ayaa ku dhawaaqay, inuu la wareegay 12 magaalo oo ka tirsan gobolka Kursk, isagoo ka jawaabaya weerarro xooggan oo ay Ukraine shalay ku qaaday magaalada Moscow ee caasimadda dalkaas.
Wasaaradda difaaca ee Ruushka ayaa sheegtay, in ciidamadeedu ay la wareegeen 12 magaalo oo ka tirsan gobolka Kursk, ayna hal maalin gudaheed qabsadeen dhul dhan 100 KM oo isku wareeg ah oo ka tirsan gobolkaas.
Mareegaha internetka ee militariga Ruushka ayaa lagu sheegay, in ciidamada Ruushka ay gacanta ku dhigeen inta badan qeybaha magaalada Sudzha ee gobalka Kursk. iyadoo wararka ay sheegayaan, in ciidamada Ukraine ay inta badan isaga baxeen magaalada iyagoo ku sii jeeday magaalada Sumy ee dalka Ukraine.
Weerarkaan ayaa kusoo beegmayo, iyadoo Saraakiisha Ruushka ay sheegeen, in Ukraine ay Talaadadii la beegsatay magaalada Moscow iyo nawaaxigeeda weerarkeedii ugu weynaa ee abid ay ku qaado caasimadda, halkaas oo ay ku dishay ugu yaraan saddex shaqaale ah oo ku sugnaa bakhaar lagu kaydiyo hilibka, halka ay ku dhaawacmeen 17 kale, waxaan muddo kooban xirmay Afarta garoon ee caasimadda.
