Ra’yi ururin la sameeyay maanta ayaa muujisay, in 4% oo keliya shacabka Yahuudda ay rumaysan yihiin in yoolkii laga lahaa dagaalka Gaza si buuxda loo gaaray, kadib markii boqolaal kun oo Falastiiniyiin ah oo barokacay ay ka soo laabteen koonfurta Marinka kuna soo laabteen waqooyiga.
Tani waxay ku timi ra’yi ururin uu sameeyay machadka Lazar, oo natiijadeedana uu daabacay wargeyska Maariv ee kamida wargaysyada ugu afka dheer ee kasoo baxa gudaha Yahuudda.
Ra’yi ururintan oo ka jawaabaysay su’aal ku saabsanayd illaa xad intee l’eg ayay Yahuuddu ka gaartay hadafkii ay ka lahayd dagaalka ay ku qaaday Gaza, ayaa lagu yiri: Boqolkiiba 4% waxa ay aaminsan yihiin in Yahuudda ay si buuxda u gaartay himiladeedii ka dhanka ahaa dagaalka Gaza, 57% waxa ay sheegeen in aan si buuxda loo gaarin hadafkii laga lahaa dagaalka, 32% waxa ay hoosta ka xariiqeen in haba yaraatee wax hadaf ah laga gaarin dagaalkii lagu qaaday marinka Gaza, halka 7% ay yiraahdeen; Jawaab gaar ah ma hayno.
Sida laga soo xigtay Maariv, 31% dadka Yahuudda waxay rumaysnaayeen, in dib ugu soo laabashada falastiiniyiinta ee waqooyiga Marinka Gaza ay la macno tahay in dagaalku uu dhammaaday, 57% waxa yiraahdeen; anaga sidaas ma aaminsanin, halka 12% -na ay ku jawaabeen in aanay garanayn jawaab toos ah oo ay ka bixiyaan su’aashaan.
Marka laga soo tago horumarka laga gaaray hirgelinta heshiiska isdhaafsiga maxaabiista iyo xabad joojinta Gaza, 36% Waxa ay aaminsan yihiin shacabka Yahuudda in heshiiska la dhaqan gelin doono illaa dhamaadka waqtigii loo qabtay, marka la barbardhigo boqolkiiba 36% oo yiri; Si buuxda looma hirgelin doono heshiiskaas, halka 28% -na ay ku jawaabeen ma garanayna.
Maariv waxa uu tilmaamay in sii socoshada fulinta heshiiska isdhaafsiga maxaabiista iyo ku noqoshada boqolaal kun oo Falastiiniyiin waqooyiga Marinka Gaza darteed ay isbahaysiga Netanyahu ku waayeen taageeradii Yahuudda.
Waxa uun tilmaamay wargayska, in haddii maanta doorasho la qabto, kooxda Ra’iisul Wasaare Benjamin Netanyahu ay ku guuleysan doonto 49 kursi oo katirsan kuraasta baarlamaanka Knesset-da, halka mucaaradka ay heli doonaan 61 kursi.
Knesset Sahaayinada ayaa ka kooban 120 kursi, waxaana lagama maarmaan ah in la helo kalsoonida ugu yaraan 61 xubnood oo baarlamaanka ah si loo soo dhiso maamulkii badali lahaa.
