Xafiiska warbaahinta dowladda ee Qaza ayaa sheegtay, in dagaalka dabar-goynta ah ee ay Yahuuddu ku haysay marinka Qaza 15-ka bilood uu sababay dhimashada in ka badan 61 Kun, iyadoo ay u sii dheer tahay barakaca, in ka badan laba Milyan oo Falastiiniyiin ah, kuwaas oo qaarkood lagu khasbay inay qaxaan in ka badan 25 jeer, oo ahayd masiibo aan hore usoo marin dadka reer Falastiin.
Xafiisku waxa uu shirkiisa jaraa’id ku sheegay, in tirada shuhadada ay gaadhayso 61,709, oo ay ku jiraan 47,487 oo cusbitaalada soo gaaray, halka 14,222 ay wali ku hoos jiraan burburka dhismayaasha ama wadooyinka oo aan ilaayo hadda la furin.
Tirada dhaawaca eek a dhalatay xasuuqii Yahuudda ayaa gaartay 111,588, halka tirada maxaabiista ay kor u dhaaftay, 6 kun oo Falastiiniyiin ah, kuwaasi oo loo geystay tacadiyo iyo jirdil aad u fool xun, waxaana tobanaan ka mid ah ay ku shahiideen xabsiyada ciidamada Yahuudda.
Xafiisku waxa uu ku macneeyey in 8% shacabka Qaza ay si toos ah dhibanayaal ugu yihiin dagaalka xasuuqa ah, kaas oo ah mid aan hore loogu arag taariikhda casriga ah, maadaama dagaaladii iyo xasuuqii ugu naxdinta badnaa ee dhacay wakhtiyadii hore aanay arag dambiyadan oo kale, sida uu sheegay afhayeenku.
Xafiisku wuxuu tilmaamay in ciidanka gumaysigu ay gaysteen 9,268 xasuuq intii ay socdeen duulaanka gardarada ah, taas oo keentay in gabi ahaanba meesha laga saaro 2,092 oo qoys oo ku jiray diiwaanka madaniga ah ee shacabka Falastiiniyiinta.
Xafiiska ayaa xaqiijiyay in dadka ugu badan ee lagu beegsaday xasuuqan ay ahaayeen caruur iyo haween, iyadoo ay ku shahiideen 17,881 caruur ah, oo ay kamid yihiin 214 caruur ah oo aan bilo jirsan, halka 17 kun oo caruur ah ay labadoodii waalid ku waayeen xasuuqan.
Waxaana sidoo kale xasuuqan ka badbaadin shaqaalihii danta guud ee ka shaqaynayay marinka Qaza, iyadoo 1,155 oo kamida xumnaha caafimaadka, 205 wariyeyaal ah iyo 194 ka tirsan ciidamada difaaca madaniga ah lagu dilay marinka Qaza, waxaa sidoo kale kamid ahaa dadka ku dhintay xasuuqan 736 qof oo kamid ahaa shaqaalaha gargaarka degdega ah iyo in ka badan 3,500 oo shaqaale dowladeed ah oo ka shaqeynayay marinka.
Xasuuqan ayaa sababay in illaa 34 isbitaal ay shaqada ka baxaan, halka in ka badan 150 kun oo guri gebi ahaanba la burburiyay, taas oo kordhisay baaxadda musiibada bini’aadantinimo ee ka jirta marinka Qaza.
Marka la eego khasaaraha dhaqaale, xafiisku wuxuu muujiyay in khasaaraha tooska ah iyo khasaaraha qaybaha kala duwan uu kor u dhaafay $50 bilyan marka la eego qiyaastii hore, halka khasaaraha qaybta gaadiidka oo keliya uu gaaray in ka badan $ 1.5 bilyan.
Gumaystaha Yahuudda waxa uu Marinka Qaza ku qaaday dagaal ballaaran oo uu kaga jawaabayo Hawlgalkii Duufaanta Al-Aqsa, kaas oo ay iska caabinta Falastiiniyiintu ka bilaabeen 7-dii October, 2023-kii dhulka Yahuudda ee ku xeeran marinka Qaza.
Muddo dhowr bilood ah, Yahuuddu waxay adeegsatay suumanka dab-damiska iyo duqeymo aan loo meel dayin, waxayna maalin walba xasuuq kula kacaysay dadka rayidka ah, waxayna burburisay isbitaallo, dugsiyo, iyo guryo badan oo hoy u ahaa boqolaal kun oo Falastiiniyiin ah.
