Wargeyska “La Croix” ee ka soo baxa dalka Faransiiska ayaa daabacay warbixin uu kaga hadlayo dhibaatada ay dadka reer Gaza wajahayaan xilliga jiilaalka, iyagoo ku jira dagaalka ay ku naf waayeen in ka badan 45 kun oo qof.
Wargeysku waxa uu ku yiri warbixintiisa “dib u bilaabista wada-xaajoodyada udhaxeeya Yahuudda iyo muqaawamada ayaa sare u qaadaya rajooyin cusub ee ku aadan in xabad-joojin laga hergaliyo marinka, kaddib markii ay wada-xaajoodyo socdeen dhawr bilood oo lasoo dhaafay, kuwaas oo aan laga gaarin wax natiijo ah, cadaadiska joogtada ah ee ay wadaan kooxaha maamulka Donald Trump ayaa u muuqata mid miro dhal ah”. “Markan, heshiis waa la gaari doonaa, Illahay idamkii,” ayuu yiri Maram Faraj, oo ah 27 jir qaxooti ku ah magaalada Khan Younis.
Si kastaba ha ahaatee, diyaaradaha Yahuudda ayaa sii wada duqeymaha joogtada ah, waxayna xoojiyeen duqeymahooda maalmihii la soo dhaafay, sida laga soo xigtay warbixinta maalinlaha ah ee Wasaaradda Caafimaadka ee Gaza,
Wargeysku waxa uu intaa ku daray, in argagaxa dambiyada ay galeen ciidamada Yahuudda ay ka caraysiisay dadka isticmaala baraha bulshada, sida kooxdii lagu gubay galbeedka Khan Yunis fiidnimadii Axadda, kaddib weerar lagu bartilmaameedsaday madarso ku taallay magaaladaas.
“Ma tirin karin tirada dadka uu soo gaaray dhaawacyo aanan weligey arkin intaan xirfadaan ku jiray,” ayuu yiri qof mutadawac ah oo ka tirsan Gargaarka Caafimaadka ee kooxda caafimaadka deg-degga ah ee Falastiiniyiinta oo ku sugnaa Isbitaalka Nasser.
Wuxuu intaas ku daray: “Qofkii ugu horreeyay ee dhaawacmay waxa ay ahayd gabar 3-jir ah, firirka ka soo baxay madaafiicda ayaa madaxa ka galay, waxaa kale oo uu firirku ka galay foolkeeda. “Qaxootigaas waa la xasuuqay ma jiraan erayo lagu sifeeyn kara” ayuu sii raaciyay tabarucuhu , waxaa dhibanayaashaas kamid ahaa 12 carruur ah oo da’doodu ka yarayd 12 sano.”
Wargeysku waxa uu tilmaamay, in Jabaliya ay noqotay meel qashin qub ah, midabkeeduna uu u ekaaday dambas. Diyaarad nooca aan duuliyaha lahayn ah ee Yahuudda oo dul heehaabaysay hawada Waqooyiga Gaza, ayaa diiwaangelisay saamaynta duqeymaha iyo hawlgallada ay ciidamadoodu Afar iyo Tobanka bilood ka wadaan Marinka Gaza, iyadoo dhammaan dhismayaashii ay noqdeen burbur iyo boor, isla arrintan oo kale ayaa ka dhacday magaalada Rafah ee koonfurta fog ee Marinka.
Marka la eego sawirro lagu qaaday Satelite-ka, Yahuudda ayaa burburisay qiyaastii boqolkiiba 70 dhismayaasha Gaza. Inta badan dadka Gaza ayaa ku jira jiilaalkii Labaad tan iyo markii ay bilaawdeen duqeymahan bahalnimada ah ee ay ku kacayso Sahaayina arxanka daran ee lagu beeray dhulka Muslimiinta.
Amjad Shaw, oo ah maamulaha Shabakadda NGO-ga Falastiin, wuxuu leeyahay: “Jiilaalkan wuu ka sii adkaan doonaa kii sannadkii hore, maxaa yeelay dadka barakacayaasha ah waxay sanadkii hore hoy ka heleen qoysaskooda, ama iskuullo iyo isbitaallo, basle baaxadda burburka sanadkan ayaa meesha ka saaray fursadahaas.
Sida laga soo xigtay xogta xafiiska Qaramada Midoobay ee isku xirka arrimaha bini’aadantinimada, 1.6 Milyan oo qof ayaa ku nool hoy ku meel gaar ah. Dhankiisa, Al-Shawa waxa uu leeyahay: “Xaaladda nololeed ee markii horeba aad u liidatay ayaa meel walba ka sii dartay, taas oo keentay jir daallan oo hadana la ildaran nafaqo-xumo, iyadoo ay udheer tahay dawo la’aan ka jira marinka, waxa uu raaciyay, waa mustaxiil inaan tilmaamo noolasheena”.
Wargeysku waxa uu sheegay, in 400 Kun in ka badan oo Falastiiniyiin ah ay gabaad ka dhigteen ilaa 100 goobood oo ku yaalla meelaha u nugul fatahaadaha, gaar ahaan dhinaca xeebaha. Dabayaaqadii Noofambar ee lasoo dhaafay heerka biyuhu wuxuu kor u kacay heer uu xaaqo teendhooyinkii iyo alaabta Boqolaal qoys oo barakacayaal ah.
“Waxaan ku dhibtoonay muddo bilo ah si aan u dhisno hoy iyo keenista sahayda muhiimka ah ee aan ugu diyaar garoobaynay jiilaalka, laakiin jiilaalka ayaa yimid iyada oo aan la daboolin baahiyaha,” ayuu yiri Hussam Saleh, oo ah shaqaale ka tirsan Xafiiska Qaramada Midoobay ee Xiriirinta Arrimaha Bani’aadamnimada ee Gaza.
Kow iyo Tobankii Diseembar, kolonyo baabuur ah oo siday gargaar bini’aadantinimo ayaa laga dhacay inta badan wixii saarnaa, kaddib markii ay soo mareen isgoyska Kerem Shalom, taasoo keentay in qiimihiisu sare u kaco, macaluul baahsanna ay ka dilaacdo Koonfurta marinka Gaza.
Dhiniciisa, goobjooge reer Gaza ah oo deggan Koonfurta Marinka Gaza ayaa aaminsan in hoos u dhaca qiimaha suuqa ee maalmihii la soo dhaafay ay tahay, calaamad muujinaysa in xabbad-joojintu ay soo dhowdahay iyo in ganacsatadu ay diyaar u yihiin inay helaan tiro badan oo gargaar bini’aadantimo ah.
Ugu danbayntii, wargeysku wuxuu tilmaamay in dadaallada diblumaasiyadeed ay dib uga soo cusboonaadeen magaalada Doha ee caasimadda Qatar toddobaadyadii la soo dhaafay, kaddib markii madaxweynaha la doortay ee Mareykanka Donald Trump uu ku dhawaaqay, inuu doonayo inuu sii daayo dhammaan la haystayaasha Yahuudda, ka hor inta uusan xafiiska la wareegin 20-ka Janaayo ee soo socota.
