Ugu yaraan 29 mayd oo tahriibayaal ah ayaa laga soo saaray labo goobood oo dhaca koonfurta-bari iyo galbeedka Liibiya, sida ay sheegeen Agaasinka Amniga Liibiya iyo hay’adda Bisha Cas ee Liibiya.
Agaasinka Amniga Liibiya ayaa sheegay, in maydad 19 ruux laga helay xabaal wadareed ku yaalla beer dhacda deegaanka Ajkhara oo 441 KM u jirta magaalada Benghazi, oo ah magaalada labaad ee ugu weyn dalka Liibiya, waxayna tilmaameen, in dhimashadu ay la xiriirto falal tahriibin ah. Agaasinka Amniga Liibiya ayaa soo dhigay Facebook-ga sawiro muujinaya ciidamada ammaanka iyo xubno ka tirsan Bisha Cas oo ku sugan magaada Jalu, iyagoo meydadka ku ridaya baco madow.
Dhinaca kale, Hay’adda Bisha Cas ee Libya ayaa barteeda Facebook-ga ku sheegtay galabnimadii shalay in koox iyada taabacsan ay soo saareen maydadka toban qof oo tahriibayaal ah, kaddib markii doonidii ay la socdeen kula degtay dekedda Dila ee magaalada Zawiya, oo qiyaastii 40-km u jirta caasimadda dalkaas ee Tripoli.
Hay’adda Bisha Cas ayaa daabacday sawirro muujinaya dad iskaa wax u qabso ah oo ku sugan goobta, iyagoo meydadka ku ridaya baca cad cad, halka mid ka mid ah uu lambarro ku qorayay mid ka mid ah bacaha.
Liibiya ayaa noqotay marin ay maraan tahriibayaasha ka soo cararaya colaadaha iyo faqriga ee u sii gudbaaya Yurub iyagoo usii maraya badda Mediterranean-ka. Dhammaadkii Janaayo, Waaxda Dembi-baarista ee Liibiya ayaa ku dhawaaqday, xoreynta 263 tahriibayaal ah oo jinsiyado kala duwan wata, kadib markii ay qafaasheen burcadka loo yaqaano ma gafaha.
