Madaxweynaha Mareykanka Donald Trump ayaa saxiixay wareegta ka hortagaysa Iran inay yeelato hubka nukliyeerka, isagoo daaha ka qaaday Trump, inuu saxiixay heshiiskaas isagoo ka cago jiidaya, wuxuuna ku tilmaamay mid aad u adag.
Iyadoo Madaxweynaha Mareykanka uu sheegay, in uu wadahadal la yeelan doono dhiggiisa Iran, Masoud Pezeshkian, ayuu hadana ku nuux-nuux saday, in Iran aysan yeelan karin hubka Nukliyeerka ah,” isagoo raaciyay “Mareykanku wuxuu xaq u leeyahay inuu ka hortago iibinta saliidda Iran ee dalalka kale.”
Intii uu ku guda jiray ololihii doorashada madaxtinimada, Trump oo ka tirsan xisbiga Jamhuuriga, wuxuu ballan qaaday inuu ku soo laaban doono siyaasaddii uu ku dhaqmi jiray muddo xileedkiisii hore, ee uu ku doonayay inuu ku burburiyo dhaqaalaha Iran, iyo In dalka Iran lagu qasbo inuu inuu wada xaajood ka gala barnaamijyadiisa gantaalaha Nukliyeerka iyo gantaalaha balaastikada ah, iyo hawlihiisa gobolka.
Trump ayaa ku eedeeyay madaxweynihii isaga ka horreeyay ee Dimuqraadiga, Joe Biden, inuu wiiqay siyaasaddii Mareykanka ee ka dhanka ahayd Iran.
Talaabadan ayaa kusoo beegmeysa xili malafka wada xaajoodka Nukliyeerka Iran uu gacanta u gali doona Trump iyo Ra’iisul wasaaraha Yahuudda Benjamin Netanyahu oo booqasho ku jooga magaalada Washington.
Wasaaradda arrimaha dibadda ee Iran ayaa sheegtay in ay si dhow ula socotay natiijada ka soo baxday wadahadaladii Trump iyo Netanyahu.
Saamaynta Tehran ee Bariga Dhexe ayaa la kulmay dib u dhac ka dib markii uu weerar la kulmay Ururka Xisbullah ee Lubnaan, iyo dhicitaankii nidaamka Bashaar Al-Asad ee dalka Suuriya.
