Madaxweynaha Mareykanka Donald Trump ayaa sheegay, in laga yaabo in uu la kulmo dhiggiisa Ruushka Vladimir Putin ka hor dhammaadka bishan, isagoo xusay in wadahadalladii Talaadadii ay wufuudda labada dal ku yeesheen caasimadda Sacuudiga ee Riyadh ay aad u wanagsanaayeen.
Trump wuxuu ku celceliyay dadaalkiisa lagu soo afjarayo dagaalka u dhexeeya Ruushka iyo Ukraine, isagoo ka digay in iskahorimaadku uu horseedi karo waxa uu ugu yeeray dagaalkii saddexaad ee adduunka.
Kulamo u dhaxeeya madaxda Mareykanka iyo Ruushka ayaa ka bilowday caasimadda Sacuudiga, waxaana looga wada hadlayaa sidii loo soo afjari lahaa dagaalka Ukraine, iyadoo sidoo kale looga wada xaajoonaya arrimo ay ka mid yihiin hagaajinta xiriirka labada dal iyo in la khafiifiyo cunaqabateynta dhaqaale ee saaran Ruushka.
Trump ayaa sheegay, in uu aad ugu kalsoon yahay in la gaaro heshiis lagu soo afjarayo dagaalka kadib wadahadalkii Riyadh.
Dhinaca kale, afhayeenka Aqalka Cad, Caroline Leavitt, ayaa sheegtay, in dadka reer Yurub aysan is dareemsiinin in laga saarayo wadahadalka Ruushka iyo Mareykanka ee ka socda Sacuudiga.
Waxay intaas ku dartay in xalinta xiisadda Ukraine ay u baahan tahay in lala hadlo labada dhinac ee isku haya, iyadoo ku nuux-nuuxsatay baahida loo qabo in dhammaan dhinacyada ay qaataan dadaallada maamulka Mareykanka.
Todobaad ka hor, Madaxweynaha Mareykanka ayaa khadka taleefoonka kula xiriiray dhiggiisa Ruushka, isagoo u sheegay inay ku heshiiyeen rabitaanka joojinta dagaalka Ruushka iyo Ukraine.
