Madaxda dalalka Suuriya iyo Turkiga ayaa shalay Talaadadii kulan albaabada u xirnaa ku yeeshay xarunta madaxtooyada ee magaalada Ankara, iyadoo ilo xog ogaal ah ay sheegeen in labada dhinac ay ka wadahadleen soo afjarida heshiis wadajir ah oo dhanka difaaca ah oo ay ka mid yihiin in Turkiga uu saldhigyo ka sameysto bartamaha Suuriya iyo tababarida ciidamo cusub oo Suuriyaan ah.
Wakaaladda wararka ee Reuters oo soo xiganaysa saraakiil ayaa sheegtay, in saldhigyada millatari ay Turkiga u ogolaan doonaa in ay difaacaan hawada Suuriya haddii ay weeraro dhacaan,waxana Ankara ay doonaysaa in ay saldhigyo ka samaysato Suuriya si ay fariin ugu dirto dagaalyahannada Kurdiyiinta ee ku sugan waqooyi bari ee dalkaasi.
Horaantii shalay Talaadadii, Sharaa waxa uu gaaray Ankara, kadib casuumaad uu ka helay Madaxweyne Erdogan, si ay uga wadahadlaan dib u dhiska iyo arrinta dagaalyahannada Kurdiyiinta.
Maamulka cusub ee Suuriya oo xuduud beenaad dhan 900 KM la wadaaga Turkiga ayaa hadda wajahaya marxalad kala guur ah oo wajahaya caqabado dhowr ah oo ay ka mid yihiin in ay dib u soo ceshadaan dhammaan dhulka Suuriya.
Dadaal lagu ilaalinayo isu dheeli tirnaanta xiriirka gobolka kaddib booqashadiisa Sacuudiga, Sharaa waxa uu hadda doonayaa in uu ka faa’ideysto xiriirka istaraatiijiyadeed ee uu la sameeyay Ankara sannadihii la soo dhaafay.
Xooggaga Dimuqraadiga ah ee Suuriya ayaa gacanta ku haya inta badan gobalada waqooyiga bari ee saliida qaniga ku ah ee Suuriya, halkaas oo ay ka dhisteen ismaamul rasmi ah in ka badan toban sano, Turkiga ayaa ku hanjabay inuu qaadi doono tillaabo militari oo uu ciidamada Kurdiyiinta uga saarayo xuduudka inkastoo Mareykanka uu dadaal ugu jiro sidii heshiis xabad joojin ah loo gaari lahaa.
