Duqaymo culus ayaa ka dhacay dalka Suudaan, kuwaas oo ay ku dhinteen in kabadan 50 qof oo Suudaniis ah, waxaana fuliyay weerardaas ciidamada taageerada dag daga ah ee ka dagaalama dalkaas.
54 qof ayaa maanta lagu dilay duqeyn ay Ciiddanka Taageerada Degdegga ah ka geysteen Suuq ku yaalla magaalladda Omdurman ee Gobalka Khartoum, sida laga soo xigtay ilaha caafimaadka.
Ilo caafimaad oo diiday in aan magacooda la sheegin ayaa wakaaladda wararka ee Faransiiska u sheegay, in dadkii ku dhaawacmay hawlgalna ay weli soo gaarayaan xarumaha caafimaadka ee magaaladaas.
Geesta kale, ciidamada Suudan ayaa barqanimadii maanta weerar ku qaaday difaacyada hore ee ciidamada taageerada degdega ah ee ku sugan magaalooyin badan oo ka tirsan gobolka Jaziira.
Ilo goob joog ah ayaa Aljazeera u sheegay, in ciidanka Suudan ay u suurtagashay in ay u dhaqaaqaan dhanka galbeed ee magaalada Hasahisa oo ah magaalada labaad ee ugu weyn gobolka Jaziira, kadib markii ay is dhiibeen Ciidamadii Taageerada Degdegga ahaa ee ku sugnaa deegaanka Waadi Shaacir ee u dhow Hasahisa.
Ilahan ayaa sidoo kale sheegay, in diyaaradaha dagaalka ee ciidamada Suudan ay weerar ku qaadeen subaxnimadii sabtida, xarumaha ciidamada RSF ay ku lahaayeen magaalooyinka Rafaa iyo Arbaji ee gobolka Jaziira, oo qiyaastii 20 KM dhanka waqooyi kaga beegan magaalada Wad Madani.
Duqeymahan xaga cirka ah ayaa waxaa barbar socday ciidamo lug ah oo katirsan dawladda Suudan, kuwaas oo doonaya inay gacanta ku dhigaan deegaanada bari ee gobolka Jaziira.
Gobolka Jaziira ayaa tan iyo Jimcihii waxaa ka dhacayay dagaallo xooggan, waxayna ilo wareedyadu sheegayaan in ciidamada dawladu ay u ruqaansadeen duleedka magaalada Rufaa, taasoo muujineysa suurtagalnimada in saacadaha soo socda ay ciidamada dawladdu ay gudaha u galaan magaaladaas.
