Saraakiisha Ukrain iyo kuwa Mareykanka ayaa maanta wareeg kale oo wada hadallo ah ku yeelanaya magaalada Riyadh, sida ay sheegeen ilo-wareedyo Ukraine ka tirsan, wadahadalkan ayaa imanaya maalin kaddib kulan dheer oo dhexmaray ergada Mareykanka iyo Ruushka.
Wadahadallada Ruushka iyo Mareykanka ayaa maalin ka hor ka furmay Sacuudiga, kaas oo looga wadahadlayay hindise xabbad-joojin oo ay Washington ku doonayso inay wadahadallo ballaaran ugu furto Labada dhinac.
Wadahadal maalin qaatay oo Isniintii Sacuudiga ku dhex maray mas’uuliyiinta Ruushka iyo Mareykanka ayay Washington ku tilmaantay tallaabo uu madaxweyne Donald Trump ku doonayo inuu ku soo afjaro dagaalka saddexda sano jirsaday. Waxaa sidaas yiri mid kamida warbaahinta dalkaas.
Ilo ka tirsan Ruushka ayaa wakaaladda wararka ee Reuters u sheegay, in wada-hadallada Riyadh la soo gebagebeeyey gelinkii dambe ee Isniintii, isla markaana qoraal qabyo ah oo wadajir ah loo diray Moscow iyo Washington si loo ansixiyo, iyadoo dhinacyadu ay doonayaan inay sii daayaan natiijada maanta oo Talaado ah.
Afhayeenka Kremlin-ka Dmitry Peskov ayaa horay u sheegay in wax dukumeenti ah aan la saxiixi doonin, sida ay sheegtay wakaaladda TASS. Halka dhanka kale wakaalada wararka ee CBS ay ku warantay in Mareykanka iyo Ruushka la filayo in subaxnimada Talaadada ay soo saaraan bayaan wadajir ah oo ku saabsan wadahadalkooda Riyadh.
Iyadoo wada-hadallada Ruushka iyo Mareykanku ay socdaan, ayaa dhanka kale Ukraine iyo Ruushku waxay sii wadaan weerarradooda, iyadoo maamulka Kyiv uu sheegay, in gantaal uu Ruushku kusoo riday dalkooda ay ku dhaawacmeen ugu yaraan 88 qof, halka Moscow ay ku eedeysay Ukraine weerar qorsheysan oo lagu dilay laba wariye iyo darawalkoodii.
