Diyaaradaha dagaalka ee Sahaayinada ayaa subaxnimadii hore ee maanta, 9 weerar ku qaaday duleedka koonfureed ee magaalada Beirut, kaddib markii ay oogu baaqeen dadka degan xaafadaha duleedka inay faarujiyaan, iyagoo ku andacoonaya inay beegsanayaan masaalixda Ururka Shiicaga ee Xisbullaah.
Tani waxay ku soo beegmaysaa iyadoo Xisbullaah ay balaarisay duqeymaha ay geysanayso saacadihii la soo dhaafay, waxayna beegsatay 3 saldhig oo ciidamada Yahuudda ay ku leeyihiin koonfurta Tel Aviv, waqooyiga Acre iyo koonfurta Haifa.
Sidoo kale duqeyn ay Xizbullaahi ku garaacday magaalo xeebeedka Nahariya ee waqooyiga dhulka ay Yahuudda gumaysato, waxaa ka dhashay dhimashada laba qof.
Yahuudda ayaa sidoo kale xalay saqdii dhexe duqeyma la beegsatay, deegaanka Al-Laylaki iyo Haret Hreik ee duleedka koonfureed ee Beirut.
Muuqaalo si toos ah loo baahiyay ayaa muujinaya, dab iyo qiiq ka baxaya ugu yaraan Saddex goobood oo kala duwan oo ku yaalla duleedka koonfureed ee Beirut, kaddib markii ay Sahaayinada duqayma la dhaceen.
