Dhakhaatiirta mutadawiciinta ah ee Suudaan ayaa ku dhawaaqay shalay Arbacadii in toddobo qof ay ku dhinteen, halka 11 kalana ay ku dhaawacmeen duqeyn ay Ciidamada Taageerada Degdegga ah la beegsadeen xero ay ku nool yihiin dad barakacayaal ah oo u dhow magaalada go’doonsan ee Al Fasher, oo ah caasimadda gobolka Waqooyiga Darfur.
Ciidamada Taageerada Degdegga ah, oo dagaal kula jiray ciidanka Suudan tan iyo Abriil 2023-kii, ayaa xerada Abu Shouk oo ay ku nool yihiin barakacayaal iyo suuq u dhow ku bartilmaansaday duqeymo madaafiic ah, sida uu sheegay qolka gargaarka degdegga ah ee xerada oo taabacsan shabakadda samatabbixinta shacabka, oo ah koox mutadawiciin ah oo ka hawlgasha Suudaan oo dhan.
Weerarkan ayaa ku soo beegmaya iyadoo Ciidamada Taageerada Degdegga ah ay sii wadeen go’doomintii bilaha qaadatay ee ay ku hayeen Al-Fasher, taas oo ay gacanta ku hayaan ciidamada Suudan.
Todobaadkii hore ayay soo saareen ciidamada taageerada degdega ah digniin ay ugu hanjabayaan in ciidanka Suudan iyo xulafadooda ay ka baxaan maagaala, taas oo ahayd Isku daygii ugu dambeeyay ee ay ku doonayeen in ay kula wareegaan gacan ku heynta magaalada, balse fashilmay.
Jimcihii, weerar ay fulisay diyaarad aan duuliye lahayn ayaa lala beegsaday isbitaalka kaliya ee weli ka shaqeeya Al-Fasher, kaasoo goobjoogayaasha maxalliga ah ay ku sheegeen inay ka dambeeyaan ciidamada Taageerada degdegga ah, waxaana ku dhintay 70 qof oo ay ku jireen bukaanno xaaladoodu liidato.
Ciidamada iyo xulafadooda ayaa iska caabiyay weeraro soo noq-noqday oo ciidamada Taageerada degdega ah ay kusoo qaadeen daafaha magaalada, iyadoo dadka shacabka ah ay dhibaato kasoo gaartay duqeymahan joogtada ah.
Gobolka Waqooyiga Darfur oo kaliya, 1.7 milyan oo qof ayaa ku barakacay, sida ay sheegtay Qaramada Midoobay, waxaana qiyaastii 2 milyan oo qof ay la ildaran yihiin cunto yari daran, halka 320 kun oo qofna ay soo food saartay macaluul.
Aagga ku hareeraysan Al-Fasher, macaluul ayaa ka jirta saddex xero oo ay ku nool yihiin dadka soo barakacay xerooyinkaas oo kala ah: Zamzam, Abu Shouk iyo Al Salam. Macluusha ayaa la filayaa bisha May ee soo socota inay ku fido shan goobood oo kale, oo ay ku jirto magaalada lafteeda, sida lagu sheegay qiimayn ay fangaraysay Qaramada Midoobay.
Colaadda ka jirta Suudaan ayaa horseeday masiibo bini’aadantinimo oo baaxad leh oo tobanaan kun ay ku dhinteen, in ka badan 12 milyan oo qof ay ku barakaceen, halka malaayiin kalana ay qarka u saaran yihiin macaluul.
