Kooxdani oo Ka Kooban 9 wadan oo kala ah South Africa, Colombia, Bolivia, Cuba, Honduras, Malaysia, Namibia, Senegal iyo Belize, ayaa Waxaa lagaga dhawaaqay shir ka dhacay magaalada Hague ee dalka Holland fiidnimadii Jimcaha.
Dalalkan ayaa ku heshiiyey inay ka shaqeeyaan sidii loo dhaqan gelin lahaa amarka lagu soo xirayo Ra’iisul Wasaaraha Yahuudda Benjamin Netanyahu iyo Wasiirkii hore ee Gaashaandhigga Yoav Galant iyo ka hortagga hubka loo dhoofiyo Yahuudda.
Waxaa Lagu Waramayaa in hindisahan uu yahay mid aan caadi ahayn oo aan horay loo arag, maadaama isbahaysi caalami ah la sameeyay markii ugu horeysay, wuxuuna si cad u sheegay inuu ka shaqeyn doono sidii Yahuudda lagula xisaabtami lahaa dambiyada ay gasho.
Sagaalkan waddan – oo lagu tilmaamay inay yihiin dalalka Koonfurta Adduunka – ay sameeyeen barnaamij gaar ah iyadoo la raacayo waxa awooddoodu u oggolaanayso inay gaadhaan laba ujeedo oo waaweyn oo ah taageeridda dadka Falastiiniyiinta iyo xaqa ay u leeyihiin inay dhistaan dalkooda, iyo inay Yauudda ku daba-galaan caalamka oo dhan maxkamadahooda.
Barnaamijkan lagu Magacaabey joojinta xadgudubyada Sida lagu sheegay war-murtiyeedka wadajirka ah ee laga akhriyey intii uu shirku socday, ayaa dalalkani waxay ku dhawaaqeen inay doonayaan inay taageeraan Maxkamadda Caalamiga ah ee Dambiyada ee la xidhiidha waaranka lagu soo xidhayo ee ay ka soo saartay Ra’iisal-wasaaraha Yahuudda Benjamin Netanyahu iyo Wasiirkiisii hore ee Difaaca Yoav Galant ee la xidhiidha dagaalka xasuuqa ah ee Gazza.
Waxaa la isku raacay in laga hortago bixinta ama wareejinta hubka, rasaasta iyo qalabka la xiriira Yahuudda dhammaan xaaladaha ay jirto khatar cad oo ah in hubkaas loo isticmaalo in lagu sameeyo ama lagu fududeeyo xadgudubyada sharciga caalamiga ah ee bini’aadantinimada ama xasuuqa.
Sagaalka wadan ayaa sidoo kale ku heshiiyey in laga hortago in maraakiibta hubka ama shidaalka u qaada Yahuuddda ay ku soo xirtaan mid ka mid ah dekedahooda.
Bayaanka wadajirka ah ayaa lagu sheegay in la qaado tallaabooyin wax ku ool ah oo dheeri ah si loo soo afjaro gumeysiga Yahuuddu Ku heyso Shacabka Falastiin, lagana saaro caqabadaha hortaagan xaqiijinta xaqa ay shacabka Falastiiniyiinta u leeyihiin aaya-ka-tashigooda, oo ay ku jirto xaqa ay u leeyihiin inay helaan dowlad madax-bannaan oo Falastiin ah, waxayna ugu baaqeen dhammaan dalalka inay qaataan wax kasta oo suurtagal ah, talaabooyinka iyo siyaasadaha lagu soo afjarayo shaqadan.
