Wasaaradda arrimaha dibadda ee Mareykanka ayaa sheegtay, in xoghayaha arrimaha dibadda Marco Rubio uu booqan doono Sacuudiga 10-ka illaa 12-ka bishan March, si uu wadahadal ula yeesho mas’uuliyiinta Ukraine.
Afhayeen u hadlay wasaaradda arrimaha dibadda ee Mareykanka oo lagu magacaabo Tammy Bruce ayaa sheegtay, in Rubio uu madaxda Ukraine kala hadli doono inta uu booqashada ku guda jiro sidii loo horumarin lahaa yoolka Trump ee ah in la soo afjaro dagaalka u dhexeeya Ruushka iyo Ukraine.
Wasiirkan ayaa dhawaan kasoo hor muuqday shaashadaha caalamka, iyadoo wajigiisa ay ku dhagan tahay caalamada saliibka, taas oo ku tusinaysa nacaybka uu u qabo Islaamka, hase ahaatee hada wuxuu soo dhawayn ka helay madaxda dabadhilifyada ah ee maamula talada boqortooyada Sucuudiga.
Madaxweyne ku xigeenka Maraykanka J.D. Vance ayaa warbaahinta horteeda ku canaantay madaxweynaha Ukraine, isagoo sheegay inuu ku guul daraystay inuu Maraykanka uga mahadceliyo shixnado hub ah oo balaayiin dollar ah oo Washington u soo dirtay dalkiisa.
Zelensky ayaa ka tagay Aqalka Cad isaga oo aan saxiixin heshiiskii macdanta ee uu Trump usoo bandhigay, taas oo uu kaga dalbaday in uu u soo celiyo canshuur bixiyayaasha Mareykanka gargaarkii uu siiyay maamulkii hore ee Joe Biden.
Zelensky ayaa warbaahinta la wadaagay, maalmo ka hor inuu diyaar u yahay inuu saxiixo heshiiskaas, isagoo diray fariin dhexdhexaadin ah oo uu Trump ku sheegay khudbad uu u jeediyay Congress-ka Talaadadii hore.
