Maamulka difaaca madaniga ah ee Gaza ayaa Sabtidii xaqiijiyay, in Falastiiniyiinta ku sugan Marinka ay ku nool yihiin xaalado bini’aadantinimo oo aad u xun, iyadoo tobanaan kun oo iyaga ka mid ah ay baanaan jiif yihiin mana haystaan hoy ama waxyaabaha aasaasiga ah ee nolosha, iyadoo ay ugu wacantahay burburkii ka dhashay Xasuuqii Yahuudda ee socday muddada 15-ka bilood ah .
Afhayeenka difaaca madaniga ah ee Gaza Mahmoud Basal ayaa war uu soo saaray oo ay heshay wakaaladda wararka ee Anadolu ku sheegay, in Falastiiniyiinta Marinka Gaza ay wajahayaan xaalado bini’aadantinimo oo aad u adag oo murugo leh, maadaama tobanaan kun oo dadkaasi ka mid ah ay weli hoy la’aan yihiin oo aanay haysan waxyaabaha aasaasiga u ah nolosha.
Basal waxa uu tilmaamay, in marinka ay soo food saartay xaalad ciriiri ah, taas oo khatar weyn ku ah nolosha boqolaal kun oo muwaadiniin ah oo ku nool cooshado ama guryo burbursan, marka loo eego qabowga iyo roobabka xooggan ee da’aya.
Dhowrkii maalmood ee la soo dhaafay, barakacayaashii Falastiin ee dib ugu soo laabtay Gaza iyo Waqooyiga marinka ayaa maalmahoodii ku soo qaatay xaalado murugo leh, iyadoo qaarkood ay seexanayeen meel bannaan ah, halka kuwa kalena ay dantu ku kaliftay inay gabaad ka dhigtaan waxa ka haray masaajidda iyo iskuullada la burburiyay, sida uu sheegay xafiiska warbaahinta ee marinka.
Isniintii la soo dhaafay, Falastiiniyiinta barakacay ayaa bilaabay inay ka soo noqdaan koonfurta iyo bartamaha marinka iyagoo usoo laabanayay Gaza iyo waqooyi Gaza, iyagoo dadka lugaynaya ay sii marayeen waddada Rashid ee dhacda xeebta, halka dadka gaadiidka watana ay marayeen waddada Salaxu al-Din.
Khamiistii la soo dhaafay, Ergeyga Gaarka ah ee Qaramada Midoobay ee qaabilsan Xuquuqda Guryeynta, Balakrishnan Rajagopal ayaa sheegay, in Yahuudda iyada oo xasuuq ka geysatay Marinka Gaza, ay ka tagtay burburka aan horay loo arkin mid la mid ah tan iyo waxa loogu yeero Dagaalkii Labaad ee Adduunka.
Wareysi uu siiyay wakaaladda Anadolu, Rajagopal wuxuu xusay, in burburka Marinka Gaza uu yahay mid aan horay loo arkin marka la fiiriyo dhanka baaxaddiisa, naxariis darada iyo saameynta ballaaran ee uu ku yeeshay Falastiiniyiinta ku nool halkaas.
Bishii Janaayo 19-keedii, heshiis xabbad-joojin ah iyo mid maxaabiis is dhaafsi ah oo u dhexeeya dhaqdhaqaaqa iska caabinta Islamiga ah ee Xamas iyo Yahuudda ayaa dhaqan galay, iyadoo ay dhexdhexaadinayeen Qatar iyo Masar.
Heshiisku wuxuu ka kooban yahay 3 marxaladood, midkiiba wuxuu qaadanayaa 42 maalmood, inta lagu gudajiro marxaladda koowaad waxaa laga wada xaajoonayaa sidii lagu bilaabi lahaa marxaladda labaad iyo seddexaad, taasoo horseedi doonta in la soo afjaro dagaalka xasuuqa ah ee ka dhanka ah reer Gaza.
