Xarakada Xamaas ayaa gaashaanka u daruurtay soo jeedintii ugu dambeysay ee ay Yahuuddu kusoo bandhigtay wadahadalada dadban ee u dhaxeeyay labada dhinac, kaas oo looga gol lahaa, in dib loo bilaabo xabad joojinta Marinka Ghaza lana sii daayo la haystayaasha Yahuudda iyo maxaabiis Falastiiniyiin ah, sida ay xaqiijiyeen laba sarkaal oo ka tirsan Xamaas.
Mid ka mid ah saraakiishan oo ka gaabsaday in magaciisa la shaaciyo ayaa yiri “Xamas waxa ay go’aansatay in aysan ku mashquulin soo jeedintii ugu dambaysay ee ay Yahuuddu usoo bandhigtay dhexdhexaadiyayaasha.”
Sarkaalkan oo tilmaamaya sababta ay u diideen soo jeedintaas ayaa sheegay, in Yahuudda ay ujeeddadeedu tahay inay ku carqaladeeyso hindisaha Masar iyo Qatar, ayna doonaysa in ay meesha ka saarto heshiis kasta.
Sarkaal kale oo ka tirsan Xamaas ayaa sheegay, in soo jeedinta Masar iyo Qatar ay ku baaqayso xabbad joojin 50 maalmood ah, muddadaas oo dhaqdhaqaaqa Falastiin uu sii deyn doono “shan askari oo Yahuud ah,” oo uu ku jiro mid haysta dhalashada Mareykanka, si loo sii daayo 250 Falastiiniyiin ah oo u xiran gumaystaha Yahuudda, oo ay ku jiraan 150 xabsi daa’im ah.
Hindisaha ayaa sidoo kale dhigaya, in Yahuudda ay sii deyso 2 Kun oo Falastiiniyiin ah oo lagu xiray Marinka Ghaza tan iyo 7-dii October, 2023-kii, xiligaas oo uu qarxay dagaalkii waynaa ee Duufanta Al-Aqsa, waxaa kale oo kamida in ciidanka Yahuudda laga saaro aagagga Ghaza ee ay dib u qabsadeen tan iyo 18-kii March, iyo in gargaarka bini’aadantinimo uu soo galo Marinka Ghaza, kaas oo Yahuuddu ay go’doomin buuxda ku soo rogtay tan iyo 2-dii March.
Si kastaba ha ahaatee, Yahuudda ayaa dhawaan soo bandhigtay hindise cusub oo maxaabiis isweydaarsi ah oo ay la galayso Xamaas, kaas oo ku baaqaya, in la sii daayo kala bar maxaabiisteeda nool iyo kuwa dhintay ee ku jira Marinka Ghaza, taas badalkeedana ay ogalaanayso xabbad-joojin 50 maalmood ah oo ka dhacda Marinka, sida laga soo xigtay warbaahinta Yahuudda.
