Afhayeenka xarakada Xamaas, Abdul Latif Al-Qanou, ayaa ku dhawaaqay, in ay billaabanayaan wadahadalka wejiga labaad ee heshiiska xabbad joojinta ee Gaza.
Waxa uu intaa ku daray, in xiriirka iyo wada xaajood marxaladda labaad uu bilowday, isagoo carabka ku adkeeyay, in muqaawada ay waqtigaan ku hawlantahay dib u dhiska iyo gargaar ufidinta shacabka reer Falastiin.
Waxa uu sidoo kale dib u cusbooneysiiyay eedeymihiisii ahaa in Yahuudda ay carqaladeyneyso hab-maamuuska bini’aadantinimada ee heshiiska xabad joojinta, iyo in ay ka baxsaneyso oo ay dib u dhigayso dhaqangelintiisa.
Waxa uu shaaca ka qaaday in dib u dhiska isbitaallada, dayactirka waddooyinka iyo ceelasha biyaha ay dib u soo celin doonto nolosha Gaza, kadib burburkii weynaa ee halkaas ka dhacay.
Warar ayaa sheegay, in Yahuudda ay doonayso in ay yarayso tirada dadka dhaawaca ah ee ka tagaya Marinka Gaza, iyada oo ku marmarsiyoonayso hubinta ammaanka.
