Dhaqdhaqaaqa iska caabinta Islaamiga ah ee Xamaas ayaa carabka ku adkeeysay, in shacabka reer Falastiin ee ku nool Daanta Galbeed ee la heysto aysan ka tanaasuli doonin hal taako oo ka mid ah dhulkooda, wax kastana ay u huri doonaan inay difaacdaan.
Tani waxay ku timid hadal uu soo saaray xubin ka tirsan xafiiska siyaasadda ee dhaqdhaqaaqa, oo lagu magacaabo Haroun Nasser al-Din, isagoo ka jawaabayay deegaamaynta cusub oo ay Yahuuda ka sameysanaysa deegaanka Gush Etzion ee u dhow magaalada barakaysan ee Al-Qudus oo dhacda koonfurta la haysto ee Daanta Galbeed.
Waxa uu Nasser al-Din carabka ku adkeeyay, in qorshahani uu ku fashilmi doono dulqaadka iyo iska caabinta dadka reer Falastiin, isagoo muujiyay sida uu ugu kalsoon yahay in dadka ku nool Daanta Galbeed aysan ka tanaasuli doonin taako ka mid ah dhulkooda, isla markaana aysan isu dhiibi doonin gumaystaha si uu barakiciyo.
Nasser al-Din oo hadalkiisa sii wata ayaa yiri “muhiimad ayay u leedahay inay sii adkeystaan dadkeena ku nool Daanta Galbeed iyo Qudus, oo aysan u hoggaansamin hanjabaadaha gumeysiga Sahaayinada iyo isku dayga lagu barakicinayo shacabka.”
Horaantii Khamiista, 15 qoys oo xoog lagu deegaameeyay Daanta ayaa soo gabagabeeyey dhismaha illaa 20 guri oo laga dhisayo deegaanka Haltz ee u dhow magaalada Qudus.
Deegaanka Halts waxa uu isku xiraa magaalada Qudus iyo deegaanka Gush Etzion oo ku yaalla meel u dhow magaalada Beytlaxam ee koonfurta daanta galbeed.
