Ruushka ayaa gantaallo culus ku bartilmaameedsatay kaabayaasha tamarta ee dalka Yukrayn, iyadoo militariga dalkaas uu ku dhawaaqay in markii ugu horeysay ay adeegsadeen diyaaradaha Mirage 2000 ee uu farsameeyo Faransiisku, si ay isaga caabiyaan weerarada Ruushka.
Ciidamada cirka ee Ukraine ayaa shaaciyay, in Ruushku uu dalkooda kusoo qaaday weerarro baaxad leh, iyadoo seeriga digniinta laga maqlay inta badan magaalooyinka waawayn ee Yukrayn, wasaaradda difaaca ee Ruushka ayaana dhankeeda sheegtay, in ciidamadeedu ay weerar ku qaadeen xarumaha gaasta iyo tamarta ee Ukraine.
Dhanka kale, maamulka Yukrayn ayaa sheegay, in Ruushka uu kusoo weraray 67 Gantaal iyo 194 Diyaaradood oo ah nooca aan duuliye lahayn. Waxayna intaas ku dareen in bartilmaameedkooda koowaad uu ahaa goobaha laga soo saaro gaaska dabiiciga ah.
Duqeyntan ayaa timid kaddib shir madaxeed ay isugu yimaadeen hogaamiyayaasha Midowga Yurub oo ka dhacay magaalada Brussels, si ay u xoojiyaan awoodda difaaca ee qaaradda, iyadoo la eegayo isbeddelka Washington ee mowqifkeeda ku aaddan dagaalka Ruushka iyo Ukraine iyo xannibaadda gargaarka milatari ee Kiev.
