Ururka shiiciga ah ee Xisbullaah ayaa ku dhawaaqay, in ay gantaallo ku duqeeyeen fariisimaha ciidamada Yahuudda ee Dishon iyo Delton, ayagoo sii wada duqeymaha ay ku beegsanayaan Haifa, Safed, iyo dhowr magaalo oo ka tirsan gobolka Galilee.
Ciidamada Yahuudda ayaa bayaan ay soo saareen ku sheegay in ay nidaamka difaaca cirka ku ogaadeen, 50 gantaal oo ka soo tallaabay xadka ay la wadaagaan Lubnaan, qaar kamida gantaaladaas waxay ku dhaceen Safeed iyo nawaaxigeeda, lamana soo sheegin wax khasaare ah oo ka dhashay , sida lagu sheegay warsaxaafadeed kasoo baxay Yahuudda.
Warbaahinta Yahuudda ayaa sheegtay in labo Israa’iiliyiin ah ay dhaawacmeen ka dib markii 5 gantaal ay ku dhaceen dayrka guri ku yaala magaalada Safed ee waqooyiga dhulka ay Yahuuddu gumaysiga ku haysato ee Falastiin.
Xisbullah ayaa xaqiijisay inay burburisay taangiyo iyo cagaf-cagafyo ay Yahuuddu leedahay, waxayna baahiyeen sawirro muujinaya in gantaallada nooca loo yaqaano Qadar 2 ay la beegsadeen duleedka magaalada Tel Aviv laba maalmood ka hor.
