Ali Akbar Ahmadian, oo ah xoghayaha Golaha Sare ee Amniga Iran, ayaa ku nuuxnuuxsaday khudbad uu u jeediyay “Ururka Ardayda” oo ku sugnaa magaalada Mashhad oo ah caasimadda gobolka Khorasan Razavi ee waqooyi bari Iran, wuxuu sheegay in dalkiisu uusan waligii isku dayin inuu la dagaallamo ama uu cirib tiro Yahuudda.
Axmadian oo darajo Sarreeye Guuto ka heysta Ilaalada Kacaanka Iraan, ayaa sharraxay in Kacaanka Iraan uu ujeedkiisu ahayn in uu huriyo iska caabin ka dhan ah Yahuudda, isagoo ku nuux-nuuxsaday in 45-kii sano ee lasoo dhaafay aysan waligood ku dhawaaqin in dagaal ay la galaan Maamulka Yahuudda.
Waxa uu sidoo kale sheegay, in waxa lagu faafiyay baraha bulshada ee ku saabsan dadaalka Iran ay ku doonayso in ay ku burburiso Yahuudda iyada oo loo marayo dagaalka ka socda marinka Qaza, ay tahay arin been abuur ah oo la doonayo in colaad looga dhex abuuro dalkooda iyo Yahuudda.
Hadalka Xoghayaha Golaha Sare ee Amniga Qaranka Iran ayaa imaanaya xilli ay Tehran cabsi ka qabto dagaal uga yimaada dhanka Yahuudda iyo Maraykanka, taas oo keentay kala daadsanaanta awooddii ururka shiicada ah ee Xisbullaah, dhicitaanka nidaamkii Bashaar Al-Asad ee Suuriya, iyo joojinta dagaalka Qaza
