Ciidamada Ruushka ayaa weerarro xooggan ku qaaday gobollo badan oo katirsan dalka Ukraine, weeraradaas ayaa sababay dhimashada iyo dhawaca dad Yukreniyaan ah, waxaana ku dhintay hal qof oo rayid ah, halka ay ku dhaawacmeen ugu yaraan 10 kale oo ay ku jiraan carruur, sida ay sheegeen saraakiisha maxalliga ah ee dalkaas.
Guddoomiyaha gobolka Zaporizhia ee koonfur-bari dalkaas ayaa bartiisa Telegramka kusoo qoray, in nin 45-jir ah la dilay, labo kale oo midi 44 jir yahay midna uu 39 jir yahay la dhaawacay, kaddib markii diyaarad aan duuliye lahayn ay ku dul dhacday baabuur dad rayid ah ay saarnaayeen oo marayay meel u dhow dhisme ay dad shacab ah dagan yihiin.
Kharkiv oo ah magaalada labaad ee ugu weyn dalka Ukraine ayuu duqa magaaladaas, wuxuu la hadlay warbaahinta dalkaas, isaga oo sheegay in sideed qof oo rayid ah oo ay ku jiraan ilmo 9 bilood jir ah iyo ilmo 7 jir ah ay ku dhaawacmeen duqayn ay gaysteen diyaaradaha dawladda Ruushka.
Dhankiisa, Oleg Synegubov, oo ah guddoomiyaha gobolka Kharkiv, ayaa xaqiijiyay in ciidamada Ruushku ay si isdaba joog ah u beegsanayaan kaabayaasha dhaqaalaha iyo goobaha dadka rayidka ah ay dagan yihiin, isagoo xusay in weerarkii ugu dambeeyay uu qayb ka ahaa hawlagallo isdaba joog ah oo lagu hayo magaalooyinka waawayn ee dalkaas.
Ciidamada Cirka ee Ukraine ayaa ku dhawaaqay inay soo rideen 41 ka mid ah 74 diyaaradood oo aan duuliyaha lahayn oo Ruushku kusoo weeraray dalkaas habeen hore, halka 20 kalena ay ku guuldareysteen inay gaaraan bartilmaameedkooda sababo la xiriira cillad dhanka elektaroonigga ah.
Dhankeeda, Wasaaradda Difaaca ee Ruushka ayaa bayaan ay soo saartay ku sheegtay, in difaaceeda cirka ay ku soo rideen 93 diyaaradood oo aan duuliye lahayn oo laga leeyahay dalka Ukraine, kuwaas oo dul heehaabayay gobollada Kursk, Rostov, iyo Belgorod, iyadoo ku tilmaantay weerarradaas kuwo jawaab u ahaa daandaansiga Kyiv.
Weerarradan ayaa imaanaya iyadoo labada dhinac ay isku eedeynayaan inay jebiyeen heshiiskii xabbad-joojinta ee uu Mareykanku dhexdhexaadiyay bishii February ee lasoo dhaafay, kaasoo diiradda lagu saarayay ilaalinta xarumaha tamarta iyo badda madow.
