Ilo xog ogaal ah ayaa kuwsoo waramaya, in Yahuudda ay duqeymo dhanka cirka ah barqanimadii maanta la beegsatay saldhig malatari oo ku yaalla magaalo xeebeedka Latakiya ee galbeedka Suuriya.
Wararka ayaa intaa ku daray, in lix duqeymo oo xiriir ah lala beegsaday saldhigaas oo ay yaallaan maraakiib dagaal iyo bakhaaro hub ah oo ay lahaayeen maamulkii hore ee ka talinayay dalkaas.
Dad goobjoogayaal ah ayaa soo sheegay, in diyaarado sahamin ah oo la rumeysan yahay in ay Yahuudda leedahay ay wali dul heehaabayaan goobta.
Dhankeeda, Wakaalladda Wararka Syria ee SANA ayaa ku warantay, in diyaaradaha guumaystaha Yahuudda ay dhowr weerar ku qaadeen agagaarka Dekedda Abyad iyo magaalada Latakiya ee galbeedka dalkaas.
Waxay intaasi ku dartay in mas’uuliyiinta ay khuseyso ee Latakia ay ku dadaalayaan sidii aysan wax khasaare ah uga dhicin goobaha la beegsaday.
Wasaaradda difaaca ee Suuriya ayaan si degdeg ah uga hadlin duqeymihii ugu dambeeyay ee ay Yahuuddu ka geysatay dalkaas, sidoo kale Sahaayinada Yahuudda dhankeeda ma aysan sheeganin mas’uuliyadda weerarka iyo bartilmaameedka.
Talaadadii ayay ahayd markii 7 qof ay ku dhinteen duqeymo cirka ah oo ay Yahuuddu la beegsatay baadiyaha galbeed ee gobalka Darca ee dalka Suuriya.
Yahuudda ayaana duqeymo wuxuusnimo ah ka geysanayso dalka Suuriya tan iyo markuu uu burburay nidaamkii rajiimka ahaa ee Bashaar Al-Asad.
