Ciidamada Yahuudda ayaa saaka dib u billowday duullaanka gardarrada ah ee ay ku heyaan marinka Qaza, iyadoo duqeymo xooggan oo cirka ah ay geysteen diyaaradaha kayaanka Sahaayinada, kuwaas oo ay ku shahiideen 419 qof, in ka badan 500 oo kalana ay ku dhaawacmeen, sida ay sheegtay wasaaradda caafimaadka ee Qaza.
Ciidamada Yahuudda ayaa ku dhawaaqay in 100 diyaaradood ay ka qeybqaateen dib u soo celinta duqeymaha dhanka cirka ah ee Marinka Qaza, waxayna sheegeen in weerarka uu sii socon doono.
Weeraradan ay fuliyeen diyaaradaha Yahuudda ayaa lala beegsaday meelo kala duwan oo ka tirsan Marinka Qaza oo ay ku jiraan xerada Al-Maghazi ee bartamaha, Khan Yunis iyo koonfurta Rafah, waxaa sidoo kale la beegsaday xerada Jabalia iyo waqooyiga Beit Hanoun.
Ilaha caafimaadka ayaa warbaahinta u sheegay in 57 shahiid lasoo gaarsiiyay cisbitaalka Yurub taas oo ka dhalatay duqeynta ay Yahuuddu ka fuliyeen magaalada Rafah.
Agaasimaha Isbitaalka Al-Shifa ee Gaza, Mohammed Abu Salmiya, ayaa sheegay in aysan awoodin in ay qaabilaan tirada sii kordheysa ee dhaawacyada, wuxuuna xaqiijiyay in daawooyinkii ay ka dhamaadeen go’doominta Yahuudda awgeed.
Abuu Salmiya ayaa warbaahinta u xaqiijiyay in ay aad u adag tahay in la gaaro goobaha la bar tilmaameedsaday, si loo soo saaro dhibanayaasha, waxa uuna intaa ku daray “Waxaan maqalnaa codadka dhibanayaasha burburka ku hoos jira, laakiin ma awoodno inaan u gurmano.
