10 Falastiiniyiin ah ayaa ku shahiiday kuwo kalana waa ay ku dhaawacmeen, kaddib duqeymo ay ciidamada Sahaayinada ka geysteen, subaxnimadii hore ee maanta madarso iyo teendhooyin ay degan yihiin dad barakacayaal ah oo ku kala yaalla magaalada Gaza iyo Khan Yuunis, iyadoo ciidamada Yahuudda ay sii wadaan howlgallada ay ku doonayaan in ay ku barakiciyaan Tobanaan kun oo ay ku go’doomiyeen waqooyiga Marinka Gaza.
Warbaahinta ayaa soo sheegaysa, in 3 qof ay ku dhinteen kuwa kalana ay ku dhaawacmeen duqeyn ay Yahuudda ku garaacday Iskuulka Fahad Al-Sabaax, kaasoo hoy u ahaa dad barakacayaal ah oo ku nool xaafadda Al-Tuffah ee bariga magaalada Gaza.
Mareegaha falastiiniyiinta ayaa baahiyay muuqaallo iyo sawirro muujinaya meydadka tiro shuhada ah oo ku jira iskuulka la beegsaday.
Gumaystaha ayaa horay xasuuq badan uga gaystay dugsiyo ay degenaayeen dad barakacayaal ah oo ku yaalla marinka Gaza, iyagoo ku andacoonaya in ay adeegsadaan dagaalyahanada Xarakada Islaamiga ah ee Xamaas.
Dhinaca kale, 5 Falastiiniyiin ah ayaa ku shahiiday, halka kuwa kalana ay ku dhaawacmeen duqayn ay Yahuudda la beegsatay teendho ay ku noolaayeen dad barakacayaal ah oo ku taalla deegaanka Al-Mawasi ee galbeedka magaalada Khan Yuunis.
