Wararka inaga soo gaaraya marinka Gaza ayaa tibaaxaya, in ciidamada Yahuudda ay maanta bariga magaalada Rafah ee koonfurta marinka Gaza ku deleen Ilmo yar oo falastiini.
Wakaaladda wararka ee Falastiiniyiinta ee WAFA, ayaa maanta oo Arbaco ah sheegtay, in wiil 16 sano jir ah uu ku shahiiday rasaasta ay fureen ciidamada gumeysiga ee ku sugan agagaarka garoonka diyaaradaha ee bariga Rafah. Waxa ayna intaa ku dareen, in madaafiicda gumaystuhu ay beegsadeen madaarka Gaza ee ku yaalla bariga Rafah.
Waxaa xusid mudan in ciidamada Yahuudda ay ku dhawaaqeen shalay oo Talaado ahayd in askartu ay rasaas ku fureen nin diiday amarkooda, kaasoo ku sugnaa koonfurta Marinka Gaza.
Ilo caafimaad oo ku sugan Khan Yuunis ayaa sheegay, in meydka wiil dhalinyaro ah oo 15 jir ahaa loo gudbiyay isbitaal ku yaala magaalada. Yahauudda ayaa marba marka ka danbayso burinayso heshiiska ay la gashay Xamaas.
