Channel-ka 12-aad ee Yahuudda ayaa qoray, in wada-hadallo heerar kala duwan ah uu Xaddii shalay dhexmaray Yahuudda, Mareykanka, Qatar iyo Masar.
Intaasi kadib, Yahuudda ayaa soo bandhigtay hindise cusub oo maxaabiis isweydaarsi ah oo ay la galayso Xamaas, kaas oo ku baaqaya, in la sii daayo kala bar maxaabiisteeda nool iyo kuwa dhintay ee ku jira Marinka Ghaza, taas badalkeedana ay ogalaanayso xabbad-joojin 50 maalmood ah oo ka dhacda Marinka, sida laga soo xigtay warbaahinta Yahuudda.
Channel-ka 13-aad ee Yahuudda ayaa tibaaxay, in xukuumadda Benjamin Netanyahu ay soo bandhigtay hindisaha cusub, kadib markii ay diiday soo jeedinta dhexdhexaadiyeyaasha ee ahayd in la sii daayo shan maxbuus oo kaliya, oo uu ku jiro Idan Alexander, oo haysta dhalashada Maraykanka iyo Yahuudda.
Waxa una intaasi ku daray, in golaha wasiirrada ee Yahuudda ay kulmeen fiidnimadii Sabtida si ay dood dheer uga yeesheen faylka maxaabiista, kadib markii Yahuudda ay heshay soo jeedin cusub oo dhexdhexaadiyayaal ah oo lagu cusboonaysiinayo heshiiska Xamaas.
Hogaamiyaha Xamaas ee Gaza, Khalil al-Hayya, ayaa ku dhawaaqay fiidnimadii Sabtida, in xarakadu ay aqbashay soo jeedinta cusub ee ay ka heshay Masar iyo Qatar. Waxa uu rajo ka muujiyay in Yahuudda aysan hor istaagi doonin hirgalinteeda, isaga oo aan wax tafaasiil ah ka bixinin soo joodintaas.
Horraantii bishii Maarso 2025, wejigii koowaad ee xabbad-joojin iyo heshiis is-dhaafsi maxaabiis oo u dhexeeyay Xamaas iyo Yahuudda ayaa la soo gabagabeeyay. Heshiiskan oo dhaqan galay 19-kii Janaayo 2025, waxaa garwadeen ka ahaa Masar iyo Qatar.
Xamaas ayaana u hogaansantay shuruudaha wejiga koowaad, balse Netanyahu ayaa diiday bilowga wejiga labaad isaga oo ixtiraamaya xagjiriinta Yahuudda ah ee kamid ah isbahaysiga talada haya.
