Tiro falastiiniyiin ah ayaa ku dhaawacmay fiidnimadii Talaadada kadib markii ciidamada Yahuudda ay ku garaaceen aagag kala duwan oo ka tirsan Daanta Galbeed, halka ciidamada gumeysiga ay gurmad dheeri ah u direen magaalada Jenin iyo xeradeeda, iyadoo ay jiraan warar sheegaya in ciidanku uu u qoondeeyay guuto shaqo joogto ah oo ka socota xeryaha Tulkarm iyo Nuur Shamsi.
Hay’adda Bisha Cas ee Falastiin ayaa bayaan ay soo saartay ku sheegtay in shaqaalaheeda ay isbitaalka u wareejiyeen 6 qof oo ku dhaawacmay weerar, iyadoo xustay in ay ciidamadaYahuudda ku qaabileen dadka dhaawaca ah ee ku sugan Koontaroolka milateri ee Jalameh ee waqooyiga magaalada Jenin, oo ku taal woqooyiga Daanta Galbeed.
Ciidamada Yahuudda ayaa sidoo kale sii wadeen in ay dadka deegaanka ka barakiciyaan guryihii ay ku noolaayeen ee ku yaalla xerada la hareereeyey, waxayna guryihii qaar ka dhigeen xeryo ciidan iyo goobo indho-indhayn ah.
Ciidanka Yahuudda ayaa jidgooyo dhoobo ah ka taagay waddada Al-Mahta waxayna u diideen muwaadiniinta in ay u guuraan aaggaas
Arrintan ayaa imaanaysa iyadoo ciidamadu ay wadaan burburinta xarumaha danta guud iyo shabakadaha biyaha iyo korontada.
Geesta kale, wargeyska Yedioth Ahronoth oo soo xiganaya ilo dhinaca ammaanka ah ayaa sheegay in haddii qorshaha Tulkarm la fuliyo la filayo in ugu yaraan bilaha soo socda ay ciidamadu si joogto ah ugu sii sugnaan doonaan xeryaha qaxootiga ee Tulkarm iyo Nuur Shams.
Warku waxa ay intaa ku dareen in go’aankani uu saamayn weyn ku yeelan doono hawl-gal, siyaasadeed iyo mid rayidba, iyadoo xustay in ciidamada Yahuudda ay isku dayayaan habkan si ay uga hortagaan guutooyinka hubaysan inay dib u soo kabtaan.
