Madaxweynaha Ukraine Volodymyr Zelensky ayaa Talaadadii sheegay, in Ukraine ay u furan tahay inay maalgashadaan shirkadaha Mareykanka, isagoo ka falcelinayay danaha Madaxweynaha Mareykanka Donald Trump uu ka leeyahay macdanta qaaliga ah ee ku jirta Ukraine.
Trump ayaa weriyayaasha kula hadlay xafiiska Oval Office, halkaas oo uu kaga cawday in Maraykanku u soo diray Ukraine gargaar milateri iyo mid dhaqaale oo ka badan kuwa ay Yurub ku taageeraan dalkaas.
Trump waxa uu sheegay, in uu ka helay dawladda Ukraine in ay diyaar u yihiin in ay heshiis la galaan Maraykanka si ay u helaan waxyaabaha muhiimka u ah dhaqaalaha casriga ah.
“Waxaan siineynaa boqolaal balaayiin doolar ah. Waxay haystaan dhul naadir ah oo macdantu ceegaagto. Waxaan rabaa in dhulalka naadir ah ay nagu aaminaan, iyaga diyaar ayay u yihiin inay u istaagaan arinkaas.” Ayuu raaciyay Trump.
Sida laga soo xigtay Trump, waxaa socda wadahadallo lagu soo afjarayo colaadda u dhexeysa Ruushka iyo Ukraine, isagoo yiri Trump: “Horumar weyn ayaan ka sameynay arrinta Ruushka iyo Ukraine, waan arki doonnaa waxa dhaca, waan joojin doonnaa dagaalkan doqonimada ah.”
